រដ្ឋមន្ត្រីការបរទេសប៉ាឡេស្ទីន លោក Riyad Al-Maliki បាននិយាយ កាលពីថ្ងៃព្រហស្បតិ៍ (ទី៣ ខែកក្កដា) ថា មេដឹកនាំប៉ាឡេស្ទីន ខកចិត្តនឹងរដ្ឋបាលសហរដ្ឋអាមេរិករបស់ប្រធានាធិបតីលោក Joe Bidenដែលមិនអាចធ្វើតាមសន្យារបស់ខ្លួន ដែលបានប្ដេជ្ញាជាមួយប៉ាឡេស្ទីន។

លោក Al-Maliki បាននិយាយថា រដ្ឋបាលសហរដ្ឋអាមេរិក មិនបានបំពេញការសន្យារបស់ខ្លួន ក្នុងការបដិសេធនូវការសម្រេចចិត្តរបស់អតីតប្រធានាធិបតីអាមេរិក លោក Donald Trump ដែលបានបំពានគោលនយោបាយរបស់សហរដ្ឋអាមេរិក និងបានទទួលស្គាល់ទីក្រុងហ្សេរុយសាឡិម (Jerusalem) ជារដ្ឋធានីនិរន្តរ៍របស់រដ្ឋអ៊ីស្រាអែល។

ប៉ាឡេស្ទីនបាន និងកំពុងអំពាវនាវឲ្យលោក Biden បំពេញតាមការសន្យារបស់លោក ក្នុងការបើកស្ថានកុងស៊ុលសហរដ្ឋអាមេរិកឡើងវិញ នៅទីក្រុងហ៊្សេរុយសាឡិម និងការិយាល័យអង្គការរំដោះប៉ាឡេស្ទីន នៅទីក្រុងវ៉ាស៊ីនតោន។

លោកបានបន្ថែមថា៖ «៣ឆ្នាំបានកន្លងផុតទៅ ចាប់តាំងពីមានការសន្យារបស់ប្រធានាធិបតី លោក Biden នោះ ហើយយើងត្រឹមតែបានឃើញការបន្តនៃការគាំទ្រផ្នែកហិរញ្ញវត្ថុ សម្រាប់ទីភ្នាក់ងារជំនួយ និងការងាររបស់អង្គការសហប្រជាជាតិ និងការគាំទ្រមួយចំនួន សម្រាប់មន្ទីរពេទ្យ នៅហ៊្សេរុយសាឡិមខាងកើត»។

នៅពេលសួរអំពីតួនាទីរបស់សហរដ្ឋអាមេរិក ក្នុងការឧបត្ថម្ភដំណើរការសន្តិភាពជាមួយអ៊ីស្រាអែល លោក Al-Maliki បានឆ្លើយយ៉ាងខ្លីថា៖ «មិនមានដំណើរការសន្តិភាព នៅមជ្ឈិមបូព៌ាទេ»។

កិច្ចចរចាសន្តិភាព ដោយផ្ទាល់រវាងអ៊ីស្រាអែល និងប៉ាឡេស្ទីន បានបញ្ចប់នៅចុងខែមីនា ឆ្នាំ២០១៤ បន្ទាប់ពីមានជម្លោះលើការតាំងលំនៅឋានរបស់អ៊ីស្រាអែល និងព្រំដែនប៉ាឡេស្ទីន៕