ភ្នំពេញ ៖ ទីភ្នាក់ងារសហប្រតិបតិ្តការកម្ពុជា-កូរ៉េ (កយកា-KOICA)សហការជាមួយរាជរដ្ឋាភិបាលកម្ពុជា លើគម្រោងជាច្រើនក្នុងវិស័យអប់រំ ចាប់ពីកំរិតអប់រំមូលដ្ឋានរហូតដល់ឧត្តមសិក្សា។ គម្រោងទាំងនោះមានដូចជា គម្រោងផ្តល់អាហារតាមសាលារៀន ដោយប្រើប្រាស់កសិផលក្នុងស្រុក (២០២០-២០២៤/១០លានដុល្លារ) គម្រោងបង្កើតមជ្ឈមណ្ឌលធុរកិច្ចថ្មីនៃកម្ពុជា (២០១៩-២០២៤/៧.៩១លានដុល្លារ) គម្រោងបង្កើតវិស្វកម្មបរិស្ថាន ដើម្បីលើកកម្ពស់ធនធានមនុស្សកម្រិតឧត្តមសិក្សានៅប្រទេសកម្ពុជា(2021-2026/6.9 លានដុល្លារ) និងគម្រោងផ្សេងៗទៀតជាច្រើន។

​ការថ្លែងរបស់លោកស្រី Choi Moon-jung ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ យ៉ាងដូច្នេះ នាឱកាសដែលការិយាល័យ KOICA ប្រចាំប្រទេសកម្ពុជា និងក្រសួងអប់រំ យុវជន និងកីឡា បានប្រារព្ធពិធីបិទវគ្គបណ្តុះបណ្តាលស្តីពី "ការលើកកម្ពស់សមត្ថភាព ICT សម្រាប់ការអប់រំនៅមធ្យមសិក្សាបឋមភូមិ” នៅមជ្ឈមណ្ឌលគរុកោសល្យភូមិភាគហ៊ុនសែនខេត្តកណ្តាល, នាថ្ងៃទី៤ ខែសីហា ឆ្នាំ២០២៣នេះ។  

លោកស្រី Choi Moon-jung បានលើកឡើងទៀតថា ប្រទេសកូរ៉េ បានដាក់ការអប់រំជាអទិភាពទី១ នៅគ្រប់កាលៈទេសៈទាំងអស់។ ហើយលោកស្រីសង្ឈឹមថា គម្រោងនេះ នឹងមានផលជៈវិជ្ជមានក្នុងការចូលរួមចំណែកកសាងមូលដ្ឋានគ្រឹះគំនិតឌីជីថល ក៏ដូចជាគាំទ្រដល់ដំណើរការអប់រំនៅប្រទេសកម្ពុជា។

ឆ្លៀតក្នុងឱកាសនេះឯកឧត្តមសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡាកីឡា បានមានប្រសថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលកូរ៉េ និង KOICA ដែលតែងតែគាំទ្រដល់ក្រសួងអប់រំ យុវជន និងកីឡា ក្នុងការលើកកម្ពស់គុណភាពអប់រំនៅកម្ពុជា។ ឯកឧត្តម ជឿជាក់ថា គម្រោងនេះ នឹងចូលរួមពង្រឹងសមត្ថភាពស្នូលរបស់យុវជនកម្ពុជា ក្នុងសតវត្សទី២១ ក៏ដូចជាចូលរួមចំណែកលើកកម្ពស់គុណភាពការអប់រំ ICT នៅក្នុងប្រទេសកម្ពុជាផងដែរ។

សូមបញ្ជាក់ផងដែរថា វគ្គបណ្តុះបណ្តាលនេះ មានសិក្ខាកាមចំនួន៣៣រូប បានទទួលវិញ្ញាបនបត្របញ្ចប់វគ្គសិក្សារយៈពេល៤សប្តាហ៍ ចាប់ពីថ្ងៃទី៣ ខែកក្កដា ឆ្នាំ២០២៣ ដល់ថ្ងៃទី៤ ខែសីហា ឆ្នាំ២០២៣។ លើសពីនេះ KOICA ក៏បានផ្តល់កុំព្យូទ័រយួរដៃ ដល់ក្រសួងអប់រំ ដើម្បីគាំទ្រដល់ការបន្តការអភិវឌ្ឍការអប់រំ នៅប្រទេសកម្ពុជា។ វគ្គបណ្តុះបណ្តាលនេះ គឺជាផ្នែកមួយនៃគម្រោងការកសាងសមត្ថភាពបច្ចេកវិទ្យាព័ត៌មាន សម្រាប់ការអប់រំនៅមធ្យមសិក្សាបឋមភូមិនៅកម្ពុជា ដែលត្រូវបានអនុវត្តតាំងពីឆ្នាំ២០២១ ជាមួយថវិកាចំនួន៧លានដុល្លារអាមេរិក។ តាមរយៈគម្រោងនេះ គ្រូបង្គោល និងបុគ្គអប់រំសរុបចំនួន១៥រូប បានបញ្ចប់ថ្នាក់អនុបណ្ឌិតនៅប្រទេសកូរ៉េ រយៈពេល ១ឆ្នាំកន្លះ ចាប់ពីខែកុម្ភៈ ឆ្នាំ២០២២ ដល់ខែមិថុនា ឆ្នាំ២០២៣។ នៅក្នុងខែតុលាឆ្នាំនេះ នាយក-នាយិការសាលាគោលដៅចំនួន២០ពីខេត្តកណ្តាល កំពង់ចាម តាកែវ និងព្រៃវែង នឹងត្រូវបានអញ្ជើញអោយចូលរួមសិក្ខាសាលានៅប្រទេសកូរ៉េ នាខែវិច្ឆិកា ឆ្នាំ២០២៣ខាងមុខនេះ។  អត្ថបទ រដ្ឋា