ទីភ្នាក់ងារសារព័ត៌មានរដ្ឋ KCNA បានឲ្យដឹង នៅថ្ងៃអាទិត្យ (ទី៦ ខែសីហា) នេះ ថា មេដឹកនាំកូរ៉េខាងជើង លោក គីម ជុងអ៊ុន បានផ្តល់ការណែនាំពីការស្រាវជ្រាវ នៅរោងចក្រផលិតសព្វាវុធធំៗ នៅចន្លោះថ្ងៃព្រហស្បតិ៍ និងថ្ងៃសៅរ៍ ដោយក្នុងនោះរួមទាំងខ្សែចង្វាក់ផលិតម៉ាស៊ីន សម្រាប់មីស៊ីលតម្រង់គោលដៅជាយុទ្ធសាស្ត្រ និងយានដ្រូនផងដែរ។

សារព័ត៌មាន KCNA បានរាយការណ៍ថា លោក គីម ក៏បានត្រួតពិនិត្យរោងចក្រផលិតគ្រាប់ផ្លោង សម្រាប់គ្រាប់រ៉ុក្កែតធំៗច្រើនខ្នាត និងឧបករណ៍បាញ់បង្ហោះដឹកជញ្ជូន ដែលជាធម្មតាត្រូវបានប្រើ ដើម្បីបាញ់មីស៊ីលបាលីស្ទិក ហើយសារព័ត៌មានប្រចាំរដ្ឋនេះ បានឲ្យដឹងទៀតថា មេដឹកនាំរូបនេះ បានផ្តល់ការណែនាំសម្រាប់ការបង្កើនសមត្ថភាពផលិតនៅរោងចក្រ ដែលជាផ្នែកមួយដ៏សំខាន់ក្នុងការពង្រឹងសមត្ថភាពការពារប្រទេស។

កូរ៉េខាងជើងបានសាកល្បងគ្រាប់រ៉ុក្កែត សម្រាប់គ្រាប់កាំភ្លើងធំ មីស៊ីលតម្រង់គោលដៅកម្រិតខ្ពស់ ហើយកាលពីខែមុន មីស៊ីលបាលីស្ទិកថ្មីចុងក្រោយបំផុតរបស់ខ្លួន រួមទាំងកាំជ្រួចអន្តរទ្វីបឥន្ធនៈរឹង (ICBM) ផងដែរ។

ដំណើរទស្សនកិច្ចរបស់លោក គីម ទៅកាន់រោងចក្រផលិតអាវុធនានា ជាច្រើនថ្ងៃជាប់ៗគ្នាបែបនេះ គឺមិនមែនជារឿងធម្មតានោះឡើយ ប៉ុន្តែបានកើតឡើងចំពេលមានការជំរុញពីប្រទេសនេះឲ្យអភិវឌ្ឍអាវុធយុទ្ធសាស្ត្រ និងសាមញ្ញផ្សេងៗ និងកើតឡើងចំពេលមានការតាំងបង្ហាញអាវុធដ៏ធំ នាពេលថ្មីៗនេះ។

កាលពីចុងខែកក្កដា ដែលជាការប្រារព្ធខួបលើកទី៧០ឆ្នាំ នៃការបញ្ចប់សង្រ្គាមកូរ៉េ កូរ៉េខាងជើងបានប្រារព្ធពិធីព្យុហយាត្រាយោធាដ៏ធំមួយ ដែលបង្ហាញពីមីស៊ីលបំពាក់នុយក្លេអ៊ែរ និងការវាយប្រហារ ហើយនិងយានដ្រូនថ្មីបំផុតរបស់ខ្លួន ដោយមានមន្ត្រីជាន់ខ្ពស់មកពីទីក្រុងប៉េកាំង និងទីក្រុងម៉ូស្គូ ចូលរួម ក្នុងនោះរួមទាំងរដ្ឋមន្ត្រីការពារជាតិរុស្ស៊ី លោក Sergei Shoigu ផងដែរ៕