ប្រទេសជប៉ុន នៅថ្ងៃអាទិត្យ (ទី៦ ខែសីហា) នេះ បានប្រារព្ធខួបលើកទី៧៨ នៃការទម្លាក់គ្រាប់បែកបរមាណូរបស់សហរដ្ឋអាមេរិកទៅលើទីក្រុងហ៊ីរ៉ូស៊ីម៉ា (Hiroshima) ជាកន្លែងដែលអភិបាលក្រុងនេះ បានជំរុញឲ្យមានការលុបបំបាត់អាវុធនុយក្លេអ៊ែរ និងបានហៅគំនិតរបស់ក្រុមមេដឹកនាំប្រទេសទាំង៧ ក្នុងការទប់ស្កាត់នុយក្លេអ៊ែរថា ជា «ការធ្វើទាំងងងឹតងងល់»។

ទិវារំលឹកដល់ជនរងគ្រោះដោសារការវាយប្រហារនុយក្លេអ៊ែរលើកទី១ របស់ពិភពលោក បានមកដល់ ខណៈដែលរុស្ស៊ីបានលើកឡើងពីការឲ្យតម្រុយនៃការប្រើប្រាស់អាវុធនុយក្លេអ៊ែរ ក្នុងសង្គ្រាមរបស់ខ្លួនជាមួយអ៊ុយក្រែន។ ពិធីនេះក៏កើតឡើងផងដែរ នៅពេលដែលភាពយន្តជីវប្រវត្តិ «Oppenheimer» ( អូផិនហៃមើ) ដែលរៀបរាប់អំពីការបង្កើតគ្រាប់បែកបរមាណូ បានក្លាយជាទីចាប់អារម្មណ៍យ៉ាងខ្លាំង ដោយមានការលក់សំបុត្រដាច់ខ្លាំងបំផុត នៅសហរដ្ឋអាមេរិក។ តែអ្នកខ្លះបានរិះគន់ភាពយន្តនេះថា មិនអើពើនឹងការបំផ្លិចបំផ្លាញពីអាវុធមហាប្រល័យនេះ នៅទីក្រុង Hiroshima និង Nagasaki ដែលបានទម្លាក់គ្រាប់បែក ៣ថ្ងៃក្រោយមក គឺនៅថ្ងៃទី៩ ខែសីហា ឆ្នាំ១៩៤៥។

ទីក្រុងហ៊ីរ៉ូស៊ីម៉ា បានទាក់ទាញការចាប់អារម្មណ៍យ៉ាងខ្លាំង ក្នុងខែឧសភា នៅពេលដែលនាយករដ្ឋមន្ត្រី លោក Fumio Kishida បានរៀបចំកិច្ចប្រជុំក្រុមប្រទេសទាំង៧ (G7) នៅភាគខាងលិចទីក្រុងនវ ដែលជាមណ្ឌលបោះឆ្នោតរបស់លោក។ មេដឹកនាំ G7 បានចេញសេចក្តីថ្លែងការណ៍បង្ហាញពីការប្តេជ្ញាចិត្តរបស់ខ្លួន ក្នុងការសម្រេចឲ្យបាននូវការរំសាយអាវុធនេះ ប៉ុន្តែបាននិយាយថា ដរាបណាមានអាវុធនុយក្លេអ៊ែរ ពួកគេគួរតែបម្រើដើម្បីទប់ស្កាត់ការឈ្លានពាន និងទប់ស្កាត់សង្គ្រាម។

នៅថ្ងៃអាទិត្យនេះ កណ្តឹងសន្តិភាពបានបន្លឺឡើងនៅម៉ោង ៨:១៥នាទីព្រឹក ជាពេលវេលាដែលគ្រាប់បែកត្រូវបានទម្លាក់។ អ្នកចូលរួមប្រហែល ៥០.០០០នាក់ នៅក្នុងពិធីរំលឹកខាងក្រៅ រួមទាំងអ្នកនៅរស់រានមានជីវិតវ័យចំណាស់ បានស្មិងស្មាធិ៍មួយស្របក់ នៅក្រោមកម្ដៅថ្ងៃ ដែលឡើងដល់ ៣០អង្សារសេ។

សូមបញ្ជាក់ថា គ្រាប់បែកដែលបានទម្លាក់លើទីក្រុងហ៊ីរ៉ូស៊ីម៉ា កាលពីថ្ងៃទី៦ ខែសីហា ដែលមានឈ្មោះហៅក្រៅថា «ក្មេងប្រុសតូច» បានសម្លាប់មនុស្សរាប់ពាន់នាក់ភ្លាមៗ និងប្រហែល ១៤០.០០០នាក់ នៅចុងឆ្នាំ។ ប្រទេសជប៉ុន បានសុំចុះចាញ់សង្គ្រាម នៅថ្ងៃទី១៥ ខែសីហា៕