នាយករដ្ឋមន្ត្រីដែលត្រូវបានបណ្តេញចេញពីអំណាចរបស់ប្រទេសនីហ្សេ កាលពីថ្ងៃសៅរ៍ (ទី៥ ខែសីហា) បាននិយាយដោយភ្ជាប់ជាមួយនឹងក្ដីសង្ឃឹមដ៏ស្ដួចស្ដើងថា រដ្ឋប្រហារយោធា កាលពីសប្តាហ៍មុន អាចត្រូវបានលុបចោលវិញដោយការទូត ដែលនេះជាការលើកឡើងប្រាប់បណ្ដាញសារព័ត៌មាន Reuters នៅមុនថ្ងៃកំណត់របស់មហាអំណាចក្នុងតំបន់ ដើម្បីឲ្យយោធាប្រគល់អំណាចដល់រដ្ឋាភិបាលជាប់ឆ្នោតវិញ។

ប្រមុខការពារជាតិមកពីសហគមន៍សេដ្ឋកិច្ចនៃបណ្តារដ្ឋអាហ្រ្វិកខាងលិច (ECOWAS) បានរៀបចំផែនការសម្រាប់សកម្មភាពយោធា ប្រសិនបើមេដឹកនាំរដ្ឋប្រហារមិនប្រគល់អំណាចឲ្យប្រធានាធិបតីជាប់ឆ្នោតលោក Mohamed Bazoum ដែលបច្ចុប្បន្នត្រូវបានយោធាឃុំខ្លួននៅឯគេហដ្ឋានរបស់លោក ក្នុងទីក្រុងនីញ៉ាមេ (Niamey) គិតត្រឹមថ្ងៃអាទិត្យ (ទី៦ ខែសីហា) នេះ។

លោក Ouhoumoudou Mahamadou នាយករដ្ឋមន្ត្រីរបស់លោក Bazoum បាននិយាយនៅក្នុងបទសម្ភាសមួយនៅទីក្រុងប៉ារីស ប្រទេសបារាំងថា ទោះជាយ៉ាងណក្ដី ក្នុងខណៈពេលវេលាកំណត់កាន់តែកៀក ក៏លោកជឿជាក់ថា អន្តរាគមន៍នៅនាទីចុងក្រោយ នៅតែអាចធ្វើទៅបាន។

ទន្ទឹមនឹងនេះដែរ ជម្រើសរបស់ ECOWAS ដែលមានចាប់ពីការលុកលុយចូលទឹកដី រហូតដល់ការជួយដល់ការប្រឆាំងរដ្ឋប្រហារក្នុងស្រុក ហានិភ័យទាំងអស់នេះ នឹងបង្កឲ្យមានអសន្តិសុខ ហើយ ECOWAS អាចប្រឈមនឹងការតតាំងផងដែរ។ ប្រទេសជិតខាងរបស់នីហ្សេ គឺម៉ាលី និងបួគីណាហ្វាសូ ជាកន្លែងដែលរបបយោធា បានដណ្តើមអំណាចក្នុងប៉ុន្មានឆ្នាំថ្មីៗនេះ បាននិយាយថា ពួកគេនឹងគាំទ្រនីហ្សេ ក្នុងករណីមានអន្តរាគមន៍យោធា៕