នគរបាល បាននិយាយថា ក្មេងប្រុសចំនួន ៥នាក់ និងឪពុករបស់ក្មេងទាំងនោះ បានស្លាប់ បន្ទាប់ពីអគ្គិភ័យ បានឆាបឆេះផ្ទះមួយខ្នង នៅក្នុងរដ្ឋ Queensland របស់ប្រទេសអូស្ត្រាលី នៅព្រឹកថ្ងៃអាទិត្យ (ទី៦ ខែសីហា) នេះ។

ស្នងការនគរបាល លោក Matt Kelly បាននិយាយថា ភរិយារបស់បុរសនោះ ដែលជាម្តាយរបស់ក្មេងប្រុសរងគ្រោះទាំងនោះ បានរត់គេចខ្លួន ដោយគ្មានគ្រោះថ្នាក់ពីផ្ទះ នៅលើកោះ Russell ដែលជាសហគមន៍តូចមួយចម្ងាយប្រហែល ៦០គីឡូម៉ែត្រ នៅភាគអាគ្នេយ៍នៃទីក្រុង Brisbane ដោយលោកបាននិយាយបន្ថែមថា ស្ត្រីនោះ «បានបាត់បង់គ្រួសារទាំងមូលរបស់គាត់»។

ភ្នាក់ងារពន្លត់អគ្គិភ័យ និងសង្គ្រោះរដ្ឋ Queensland បាននិយាយថា ផ្ទះបានរលំបាក់ ដោយសារតែភ្លើង ហើយលំនៅឋាន នៅក្បែរនោះមួយចំនួន ត្រូវបានប៉ះពាល់។

នគរបាលបានប្រាប់ថា ការស៊ើបអង្កេតកំពុងដំណើរការទៅ ដើម្បីកំណត់ពីមូលហេតុនៃការឆេះ ដែលមិននឹកស្មានដល់នេះ៕