ការវាយប្រហារដោយមីស៊ីលរបស់អ៊ីស្រាអែល នៅជិតរដ្ឋធានីដាម៉ាស( Damascus) របស់ប្រទេសស៊ីរី បានសម្លាប់ទាហានស៊ីរីយ៉ាងហោចណាស់ ៤នាក់ និងរបួសបួននាក់ផ្សេងទៀត នេះបើយោងតាមទីភ្នាក់ងារសារព័ត៌មានSANAផ្លូវការ។ ដោយដកស្រង់ប្រភពយោធាមួយ សារព័ត៌មាន SANA បាននិយាយថា ការវាយប្រហារនេះ បានកើតឡើង នៅព្រឹកថ្ងៃចន្ទនេះ។

SANA បានឲ្យដឹងទៀតថា នៅម៉ោង២:២០នាទីព្រឹក [២៣:២០ម៉ោងសកល ថ្ងៃអាទិត្យ សត្រូវរបស់អ៊ីស្រាអែល បានធ្វើការវាយប្រហារតាមអាកាសពីទិសដៅនៃតំបន់ខ្ពង់រាបហ្គោឡង់(Golan) របស់ស៊ីរីដែលកាន់កាប់ដោយអ៊ីស្រាអែល ដោយកំណត់គោលដៅទៅលើតំបន់នានានៅក្នុងបរិវេណនៃទីក្រុងដាម៉ាស។

ការវាយប្រហារនោះ បានបណ្តាលឲ្យទាហាន៤នាក់ស្លាប់ និងរបួស៤នាក់ផ្សេងទៀតរងរបួស។ទីភ្នាក់ងារនេះ ក៏បានរាយការណ៍ពីការខូចខាតសម្ភារៈមួយចំនួន ហើយបាននិយាយថា ការការពារដែនអាកាសស៊ីរី បានស្ទាក់ចាប់មីស៊ីលមួយចំនួនរបស់អ៊ីស្រាអែល។

ពុំមានការអត្ថាធិប្បាយភ្លាមៗពីអ៊ីស្រាអែលទេ។