ប្រទេសចិន បានប្រាប់ប្រទេសហ្វីលីពីន នៅថ្ងៃចន្ទ (ទី៧ ខែសីហា)នេះ ឲ្យយកនាវាចម្បាំងដែលកឿងចេញពីតំបន់កោះ Thomas Shoal ទី២ ក្នុងសមុទ្រចិនខាងត្បូង បន្ទាប់ពីបានរារាំងនាវាដឹកជំនួយផ្គត់ផ្គង់ចំនួន២ របស់ទីក្រុងម៉ានីល ដោយប្រើទុយោបាញ់ទឹក កាលពីចុងសប្តាហ៍កន្លងមក ខណៈដែលភាគីទាំង២ បានអះអាងពីសិទ្ធិលើកោះនេះរៀងៗខ្លួន។

ប្រទេសហ្វីលីពីនបានចោទប្រកាន់ឆ្មាំល្បាតឆ្នេរចិនថា បានរារាំង និងបាញ់ទឹកដាក់លើនាវាដឹកជំនួយផ្គត់ផ្គង់យោធាហ្វីលីពីន ជាអ្វីដែលហ្វីលីពីន បាននិយាយថា ជាសកម្មភាពឆ្លាស់កងទ័ពជាប្រចាំ និងបេសកកម្មផ្គត់ផ្គងសម្ភារៈសំខាន់ៗ កាលពីថ្ងៃសៅរ៍ (ទី៥ ខែកក្កដា) សម្រាប់នាវាចម្បាំងហ្វីលីពីន ដែលជានាវាច្រែះរបស់អាមេរិកសម័យសង្គ្រាមលោកលើកទី២ ដែលមានកងទ័ពមួយចំនួនតូចរស់នៅលើនោះ។

ឆ្មាំល្បាតឆ្នេរចិន បានឲ្យដឹងនៅក្នុងសេចក្តីថ្លែងការណ៍ នាថ្ងៃចន្ទនេះថា៖ «ប្រទេសចិនបាននិយាយថា ខ្លួនបានប្រាប់ទីក្រុងម៉ានីលរួចហើយកុំឲ្យបញ្ជូននាវាទៅកាន់កោះ Thomas Shoal ទី២ និងកុំឲ្យដឹកបញ្ជូនសម្ភារៈសំណង់ដែលប្រើសម្រាប់ការជួសជុល និងការពង្រឹងទ្រង់ទ្រាយធំ ទៅកាន់នាវាចម្បាំងនោះ បន្ទាប់ពីខ្លួនបានដឹងពីផែនការផ្គត់ផ្គង់ ថ្មីៗនេះ»។

ចិនក៏បានជំរុញហ្វីលីពីនធ្វើឲ្យដើមវិញនូវតំបន់កោះ Thomas Shoal ទី២ ហើយនិយាយថា ខ្លួនបានអនុញ្ញាតឲ្យដឹកជញ្ជូនសម្ភារៈចាំបាច់ប្រើប្រាស់ប្រចាំថ្ងៃ រួមទាំងអាហារទៅកាន់នាវា ដែលកឿងនោះ ដោយបន្ថែមថា ខ្លួនបានប្រើប្រាស់ការបាញ់ទឹកដាក់ ដើម្បីជៀសវាងការប៉ះទង្គិចពីការស្ទាក់ចាប់ដោយផ្ទាល់។

ប្រទេសចិនកាលពីចុងសប្តាហ៍ បាននិយាយថា ខ្លួនមានអធិបតេយ្យភាពដែល «មិនអាចប្រកែកបាន» លើតំបន់នេះ ហើយបានជំរុញឲ្យហ្វីលីពីនបញ្ឈប់សកម្មភាពរំលោភបំពាននៅដែនទឹកនេះ។ តែប្រធានាធិបតីហ្វីលីពីនលោក Ferdinand Marcos Jr ( ហ្វើឌីណាន ម៉ាកូស ជូនៀ) បានលើកឡើងនៅថ្ងៃចន្ទថា ប្រទេសរបស់លោកនៅតែបន្តអះអាងអធិបតេយ្យភាព និងសិទ្ធិដែនដីរបស់ខ្លួន ទោះបីជាមានបញ្ហាប្រឈមនៅសមុទ្រចិនខាងត្បូងក៏ដោយ។ លោក Marcos បាននិយាយថា ប្រទេសហ្វីលីពីន បានបន្តការតវ៉ារបស់ខ្លួនប្រឆាំងនឹងប្រទេសចិន។

គ្មាននរណាម្នាក់រងរបួសនោះឡើយ នៅក្នុងហេតុការណ៍ប៉ះទង្គិច នៅដែនសមុទ្រនេះ ប៉ុន្តែហ្វីលីពីន កំពុងគិតពីជំហានបន្ទាប់ ក្នុងផ្គត់ផ្គង់នូវសម្ភារៈផ្សេងៗដល់កងទ័ព៕