ភ្នំពេញ ៖  ក្រសួងអប់រំ យុវជន និងកីឡា បានប្រកាសផ្ដល់ជាថវិកាគាំទ្រដល់គម្រោងស្រាវជ្រាវវិទ្យាសាស្រ្ត សម្រាប់ឆ្នាំ ២០២៣។ គម្រោងផ្ដល់ថវិកាស្រាវជ្រាវនេះ គឺបើកឱកាសដល់គ្រឹះស្ថានសិក្សារដ្ឋ ឯកជន ស្ថាប័នស្រាវជ្រាវ និងអ្នកស្រាវជ្រាវទាំងអស់។

​មូលនិធិស្រាវជ្រាវ គំនិតច្នៃប្រឌិត និងនវានុវត្តន៍ នៃក្រសួងអប់រំ យុវជន និងកីឡា បានប្រកាសផ្ដល់ជា,ថវិកាគាំទ្រដល់គម្រោងស្រាវជ្រាវវិទ្យាសាស្រ្ត សម្រាប់ឆ្នាំ២០២៣។ គម្រោងថវិកានេះ គឺមានគោលដៅរួមចំណែកលើកកម្ពស់វប្បធម៌នៃការស្រាវជ្រាវ បំផុសគំនិតច្នៃប្រឌិត និងជំរុញនវានុវត្តន៍ ឆ្លើយតបទៅនឹង

ទីផ្សារពលកម្ម និងសកលភាវូបនីយកម្ម។ 

តាមរយៈសេចក្ដីជូនដំណឹង បញ្ជាក់ថា ទំហំថវិកាគាំទ្រការស្រាវជ្រាវ អាចស្នើសុំក្នុងចន្លោះ ៤០ សិបលានរៀល រហូតដល់ ១២០លានរៀល ដោយផ្អែកលើប្រធានបទស្រាវជ្រាវ។ ការស្រាវជ្រាវ អាចមានរយៈពេល ១ឆ្នាំ ឬច្រើនជាងនេះ គិតចាប់ពីកាលបរិច្ឆេទចុះកិច្ចព្រមព្រៀង។ 

ចំពោះគម្រោងស្រាវជ្រាវវិទ្យាសាស្ត្រ ដែលក្រសួងអប់រំ បើកឱកាសជូន គ្រឹះស្ថានសិក្សារដ្ឋ ឯកជន ស្ថាប័នស្រាវជ្រាវ និងអ្នកស្រាវជ្រាវ ផ្តោតលើ វិស័យកសិកម្មអនុវត្ត  ការលើកកម្ពស់ភាពជាមជ្ឈមណ្ឌលឧត្តមានុវត្តរបស់ស្ថាប័ន  បច្ចេកវិទ្យាឌីជីថល ផ្តោតលើមេកាត្រូនិច បច្ចេកវិទ្យា AI ឬបច្ចេកទេស AR- VR- XR

វិទ្យាសាស្ត្ររូបធាតុ  ការអភិរក្សកសិកម្ម ដើម្បីលើកកម្ពស់គុណភាពដី តុល្យភាពរវាង Fauna និង Flora និង ការទប់ស្កាត់ការហូរច្រោះ និងការសឹករិចរិលនៃដីកសិកម្ម។

ការដាក់ពាក្យស្នើសុំត្រូវភ្ជាប់ជាមួយ លិខិតស្នើសុំចូលរួមប្រកួតប្រជែងថវិកាមូលនិធិ (Cover Letter) ២.ប្រវត្តិរូបសង្ខេបនៃអ្នកស្នើសុំ (CV of Applicants /Researchers) ការសង្ខេបព័ត៌មានស្តីពីស្ថាប័ន ឬក្រុមហ៊ុន(Profile of the Company/Organization) និង គម្រោងសំណើស្រាវជ្រាវ (៣-៥ទំព័រ)។

សំណុំពាក្យស្នើសុំ ព្រមទាំងឯកសារពាក់ព័ន្ធទាំងអស់ ត្រូវរៀបចំជាទម្រង់ PDF តែមួយ (1File) រួចផ្ញើមកអ៊ីម៉ែល [email protected] Subject: RCI Application of (name of applicant/company)for (name of the priority topics as stated in the table above)។

ចំពោះកាលបរិច្ឆេទនៃការឈប់ទទួលសំណុំពាក្យស្នើសុំ មិនត្រូវបានកំណត់ឡើយ ប៉ុន្តែការពិនិត្យជ្រើសរើសគម្រោងស្រាវជ្រាវ នឹងត្រូវធ្វើឡើងរៀងរាល់ ១ ត្រីមាសម្តង។ ដោយឡែកការជ្រើសរើសគម្រោងស្រាវជ្រាវសម្រាប់ត្រីមាសទី៣ ឆ្នាំ២០២៣ នឹងកំណត់ត្រឹម ថ្ងៃទី២០ ខែសីហា ឆ្នាំ២០២៣៕ អត្ថបទ៖ គឹមហុក