លោក Rahul Gandhi បានវិលត្រឡប់មកកាន់សភាប្រទេសឥណ្ឌាវិញហើយ នៅថ្ងៃចន្ទ (ទី៧ ខែសីហា) នេះ បន្ទាប់ពីមានសេចក្តីសម្រេចពីតុលាការកំពូល ដែលជួយលើកមុខមាត់នៃគណបក្ស Congress របស់លោក និងសម្ព័ន្ធមិត្តនៃគណបក្សប្រឆាំងរបស់លោក នៅមុនការបោះឆ្នោតដកសេចក្ដីទុកចិត្តប្រឆាំងនឹងរដ្ឋាភិបាលរបស់នាយករដ្ឋមន្ត្រីលោក Narendra Modi។

លោក Gandhi បានចូលទៅក្នុងអគារសភា បន្ទាប់ពីបានបង្ហាញការគោរពចំពោះរូបសំណាកមេដឹកនាំចលនាសេរីភាពលោក មហាត្មៈ គន្ធី (Mahatma Gandhi) នៅក្នុងអគារ និងក្រោយពីសមាជិកសភាមកពីគណបក្ស Congress និងគណបក្សប្រឆាំងផ្សេងទៀត បានជួបជុំគ្នានៅខាងក្រៅ ដើម្បីស្វាគមន៍រូបលោក។

ការវិលត្រឡប់មកកាន់សភាវិញរបស់លោក Gandhi ដែលជាអ្នកបន្តវេននយោបាយដ៏ល្បីបំផុតមួយរបស់ប្រទេសឥណ្ឌា ត្រូវបានគេរំពឹងថា នឹងពង្រឹងសំឡេងនៃសម្ព័ន្ធភាពអ្នកប្រឆាំងចំនួន ២៦គណបក្ស ដែលទើបបង្កើតថ្មី ដែលដឹកនាំដោយគណបក្ស Congress។

សូមបញ្ជាក់ថា លោក Gandhi វ័យ ៥៣ឆ្នាំ ត្រូវបានកាត់ទោស កាលពីខែមីនា ឆ្នាំ២០១៩ លើការអត្ថាធិប្បាយ ដែលត្រូវបានចាត់ទុកថា ជាការប្រមាថដល់លោក Modi និងអ្នកផ្សេងទៀត ដែលមានឈ្មោះដូចគ្នា ហើយត្រូវបានដកអាសនៈសភារបស់លោក នៅពេលត្រូវបានកាត់ទោសនោះ។ តុលាការកំពូលកាលពីសប្តាហ៍មុន បានសម្រេចព្យួរការកាត់ទោសនេះ ដោយអនុញ្ញាតឲ្យលោក Gandhi ត្រឡប់ទៅកាន់សភាវិញ ហើយចូលរួមប្រកួតប្រជែងការបោះឆ្នោត នៅឆ្នាំក្រោយ៕