ប្រព័ន្ធផ្សព្វផ្សាយរបស់ថៃ បានរាយការណ៍ថា កូនប្រុសរបស់តារាសម្ដែងភាពយន្តដ៏ល្បីល្បាញរបស់ប្រទេសអេស្ប៉ាញ លោក Rodolfo Sancho បានសារភាពថា ខ្លួនបានសម្លាប់ និងកាប់បំបែកសពគ្រូពេទ្យវះកាត់កែសម្ផស្សជនជាតិកូឡុំប៊ីម្នាក់ នៅលើកោះ Phangan( ផៈង៉ាន់) របស់ប្រទេសថៃ មុនពេលប៉ុនប៉ងបិទបាំងអំពើឧក្រិដ្ឋកម្មនេះ។

ការសារភាពនេះ កើតឡើងបន្ទាប់ពីសាកសពមនុស្សត្រូវបានគេរកឃើញនៅកន្លែងចាក់សំរាមមួយ កាលពីថ្ងៃព្រហស្បតិ៍ (ទី៣ ខែសីហា) នៅលើកោះដ៏ល្បីល្បាញមួយ សម្រាប់ភ្ញៀវទេសចរធ្វើពិធីជប់លៀងព្រះចន្ទពេញវង់។

នគរបាលបាននិយាយថា បុរសជនជាតិអេស្ប៉ាញវ័យ ២៩ឆ្នាំ ឈ្មោះ Daniel Sancho Bronchalo ក៏បានសារភាពដែរថា បានបោះចោលរាងកាយផ្នែកខ្លះទៅក្នុងសមុទ្រ។ បំណែកនៃសាកសពជាច្រើនទៀត ត្រូវបានគេរកឃើញ នៅក្នុងបន្ទប់សណ្ឋាគារ ដែលគេជឿថា ការសម្លាប់នេះ បានកើតឡើងនៅទីនេះ។

យោងតាមការផ្សាយពីប្រព័ន្ធផ្សព្វផ្សាយក្នុងស្រុក Thai PBS បានឲ្យដឹងថា រូបភាពវីដេអូពី CCTV (កាមេរ៉ាសុវត្ថិភាព) បានបង្ហាញឲ្យឃើញលោក Bronchalo និងលោក Edwin Arrieta Arteaga ដែលជាជនជាតិកូឡុំប៊ីវ័យ ៤៤ឆ្នាំ ជិះកង់ជាមួយគ្នាប៉ុន្មានថ្ងៃ មុនពេលដែលសាកសពត្រូវបានប្រទះឃើញ។ ចំណែកឯសារព័ត៌មាន NationThailand.com បានផ្សាយថា នគរបាលបាននិយាយថា លោក Bronchalo និងលោក Arteaga គឺជាគូស្នេហ៍នឹងគ្នា។

គួរបញ្ជាក់ដែរថា ឪពុករបស់លោក Bronchalo ឈ្មោះ Rodolfo Sancho មានភាពល្បីល្បាញ ដោយសារការសម្ដែងរបស់លោកនៅក្នុងភាពយន្ត ដែលមានចំណងជើងថា «Isabel» «The Ministry of Time» និង «Hospital Central»៕