កណ្ដាល ៖ ប្រជាពលរដ្ឋចំនួន១៧១គ្រួសារ​​ រស់នៅក្នុងសំណង់បណ្តោះអាសន្ន ស្ថិតក្នុងទីតាំងគម្រោង​សាងសង់អាកាសយានដ្ឋានថ្មី ក្រោមការព្រមព្រៀងដោះដូរទៅនឹងលំនៅដ្ឋានបណ្តោះអាសន្នរបស់ពួកគាត់ក្នុងគម្រោង ជាមួយនឹងលំនៅដ្ឋានថ្មី។​

ពិធីប្រគល់-ទទួលលំនៅដ្នានផ្ទះ១៧១ខ្នងផ្ទះ ដល់ប្រជាពលរដ្ឋ ធ្វើឡើងកាលពីព្រឹកថ្ងៃទី២១ ខែឧសភាស្ថិត​​​នៅភូមកំពង់តាលន់ ឃុំបឹងខ្យាង ស្រុកកណ្តាលស្ទឹង ខេត្តកណ្តាល។​ ពិធីនេះ ធ្វើឡើង នៅក្រោមអធិបតីយភាពរបស់ ឯកឧត្តម បេងហុង សុជាតិ ខេមរ៉ូ អគ្គនាយកនៃអគ្គនាយកដ្ឋានលំនៅដ្ឋាន ដំណាងដ៏ខ្ពង់ខ្ពស់ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោកឧកញ៉ា​ ឆាល វ៉ាន់ អគ្គនាយករង ក្រុមហ៊ុនវិនិយោគអាកាសយានដ្ឋានកម្ពុជា (Cambodia Airport Investment Co Ltd) ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល។​

ថ្លែងក្នុងពិធីប្រគល់លំនៅដ្ឋានជូនប្រជាពលរដ្ឋ១៧១ រស់នៅក្នុងសំណង់បណ្តោះអាសន្ន ស្ថិតក្នុងទីតាំងគម្រោងសាងសង់អាកាសយានដ្ឋានថ្មី ឆាល វ៉ាន់ មានប្រសាសន៍ថា អាគារស្នាក់នៅនេះ​ ជាអំណោយដ៏ថ្លៃថ្លា របស់ សម្តេចអគ្គមហាសេនាបេតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយៈអ្នកឧកញ៉ា ពុង ឃាវសែ ជូនចំពោះប្រជាពលរដ្ឋរស់នៅលើទំនប់ លេខ ៥៤ ទំនប់លេខ ៩២ និងទំនប់លេខ ៩៤ ស្ថិតក្នុងតំបន់កសាងអាកាសយានដ្ឋានអន្តរជាតិភ្នំពេញថ្មី។​

ស្ថិតក្នុងភូមកំពង់តាលន់ ឃុំបឹងខ្យាង ស្រុកកណ្តាលស្ទឹង ខេត្តកណ្តាល សំណង់ផ្ទះធ្វើឡើងពីថ្ម ប្រក់ស័ង្កសី។ មួយគ្រួសារទទួលបាន ផ្ទះមួយខ្នង លើផ្ទៃដី ក្បាល៥ម៉ែត្រ និងបណ្តោយ២០មែត្រ ដោយក្នុងនោះ ទំហំផ្ទះ ទទឺង៥ ម៉ែត្រ និងបណ្តោយ៨ម៉ែត្រ និងទីធ្លាក្រោយផ្ទះប្រវែង ៦ម៉ែត្រ។​

ផ្លូវចូលលំនៅដ្ឋាន ក្រាលថ្មប្រវែង ១,៩គីឡូម៉ែត្រ ទទឹង៨ម៉ែត្រ មានបំពាក់បង្គោលភ្លើងអគ្គសនី ភ្ជាប់បណ្តាញទឹកស្អាត និងមានទីធ្លាមុខផ្ទះ ធំទូលាយ បង្កនៅបរិយាកាសស្រស់ស្អាត សម្រាប់រស់នៅ។​

គម្រោងសាងសង់លំនៅដ្ឋាននេះ ប្រើប្រាស់ថវិកាសាងសង់ប្រមាណ ១,១ លានដុល្លា ចាប់ផ្តើមសាងសង់កាលពីពាក់កណ្តាលឆ្នាំ២០២០ និងបញ្ចប់នៅខែមករា ឆ្នាំ២០២១នេះ។​ សំណង់ត្រូវបានពិនិត្យបច្ចេកទេសសាងសង់ដោយក្រុមវិស្វកម្ម របស់ក្រសួងរៀបចំដែនដី នគរូបនីយកម្ម និងសំណង់ ត្រឹមត្រូវតាមបច្ចេកទេស។

មានប្រសាសន៍ក្នុងពិធីនោះដែរ ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល លើកឡើងថា ការផ្តល់លំនៅដ្ឋានថ្មី​ដល់ប្រជាពលរដ្ឋរងផលប៉ះពាល់ស្ថិតក្នុងតំបន់អភិវឌ្ឍន៍អាកាសយានដ្ឋានអន្តរជាតិភ្នំពេញថ្មី ឆ្លុះបញ្ជាំង ពីការខិតខំប្រឹងប្រែងរបស់រាជរដ្ឋាភិបាល យកចិត្តទុកដាក់ ដោះសា្រយសំណងជូនប្រជាពលរដ្ឋ។​

ទន្ទឹមនឹងនេះ ឯកឧត្តម គង់ សោភ័ណ្ឌ បញ្ជាក់ថា នឹងខិតខំដោះស្រាយសំណងគោលនយោបាយជាមួយប្រជាពលរដ្ឋដែលនៅសល់សល់ ដើម្បីធ្វើយ៉ាងណា ឱ្យដំណើរការសាងសង់អាកាសយានដ្ឋានអន្តរជាតិភ្នំពេញថ្មីនេះ​ ដំណើរការតាមការគ្រោងទុក ដោយគ្រោងនឹងបញ្ចប់ ការសាងសង់ និងដាក់ឱ្យដំណើរការ នៅឆ្នាំ២០២៣ខាងមុខ។​

ក្នុងពិធីនោះដែរ គ្រួសារនីមួយៗ ក៏ទទួលបានប្រាក់ឧបត្ថម្ភ ៥ម៉ឺនរៀល ពីសម្តេចតេជោ ហ៊ុន​ សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយៈលោកឧកញ៉ា​ ឆាល វ៉ាន់៕ អត្ថបទ៖ វណ្ណៈ