អាល្លឺម៉ង់ ៖ ភ្លៀងអស់រយៈពេលជាច្រើនសប្តាហ៍ និងព្យុះផ្គរន្ទះ កំពុងជ្រៀតជ្រែកដល់ការប្រមូលផលរបស់ប្រជាកសិករអាល្លឺម៉ង់ ។ 

 លោក Thomas Doeringគឹជាកសិករមួយរូបរស់នៅតំបន់អាល្លឺម៉ង់ខាងលិច មានការព្រួយបារម្ភយ៉ាងខ្លាំងថានឹងបាត់បង់ផលដំណាំស្រូវសាលីនៅក្នុងតំបន់របស់លោក ពេលដែលការប្រមូលផល បានផ្អាកអស់រយៈពេលជិត ៤សប្តាហ៍មកហើយ ។ 

 លោក Doeringនិយាយប្រាប់ទីភ្នាក់ងារព័ត៌មានរ៉យទ័រថា ស្រូវសាលីខ្លះ ចាប់ផ្តើមចេញពន្លកទៅហើយ ធ្វើឲ្យវាមិនអាចប្រើប្រាស់ធ្វើជាចំណីសត្វ ឬធ្វើជាម្ស៉ៅសម្រាប់នំបុ័ង ខណៈដែលដំណាំមួយនេះ អាចប្រើបានជាឥន្ធនៈនៅក្នុងរោងចក្រជីវឧស្ម័ន ។ 

 លោក Doeringរំពឹងថា នឹងខាតបង់បង់ប្រហែលពី ១០ភាគរយ ទៅ ១៥ភាគរយនៃការប្រមូលផលស្រូវសាលីរបស់លោកក្នុងឆ្នាំនេះ ។ 

 លោកបន្តថា ពួកយើងជួបព្យុះផ្គរន្ទះខ្លាំងនៅដំណាច់ខែមិថុនា ដោយនាំមកជាមួយភ្លៀងធ្លាក់ និងខ្យល់បក់ខ្លាំង ។ តំបន់ជាច្រើនរងការជន់លិចទាំងស្រុង ធ្វើឲ្យពួកយើងមិនអាចប្រមូលផលបានឡើយ ហើយដំណាំស្រូវសាលីរបស់ពួកយើង រងការខូចខាតច្រើន ៕