កាលពីថ្ងៃចន្ទម្សិលមិញ តុលាការកំពូលឥណ្ឌា បានពិនិត្យរាល់ករណីទាំងអស់នៃអំពើហិង្សាលើស្រ្តីដែលត្រូវបានប្រព្រឹត្ត អំឡុងការប៉ះទង្គិចគ្នាអស់រយៈពេល ៣ខែរបស់ក្រុមកុលសម្ព័ន្ធ នៅរដ្ឋភាគឦសាន Manipur ចាប់តាំងពីខែឧសភារហូតមក។

អង្គចៅក្រមមានសមាជិក ៣រូប ដឹកនាំដោយប្រធានចៅក្រុម D.Y. Chandrachudនិយាយថា ពួកគេនឹងតែងតាំងមន្រ្តីនគរបាលជាន់ខ្ពស់ចូលនិវត្តន៍មួយរូប ដើម្បីត្រួតពិនិត្យពាក្យបណ្តឹងទាំងអស់នៃអំពើហិង្សាផ្លូវភេទ ដើម្បីឲ្យមានការស៊ើបអង្កេតដោយការិយាល័យស៊ើបអង្កេតកណ្តាលសហព័ន្ធ។

លោក Chandrachudបន្តថា មន្រ្តីនគរបាលចូលនិវត្តន៍រូបនោះ នឹងរាយការណ៍ត្រឡប់មកកាន់តុលាការកំពូលវិញ។

គួរឲ្យដឹងថា វីដេអូរបស់ស្រ្តី ២នាក់របស់កុលសម្ព័ន្ធ Kuki ដែលត្រូវបានដង្ហែអាក្រាតដោយក្រុមកុលសម្ព័ន្ធ Meiteiធ្វើឲ្យមានការថ្កោលទោសយ៉ាងខ្លាំងពីអន្តរជាតិ។ ស្រ្តីទាំង ២រូបនោះ និយាយនៅក្នុងបណ្តឹងនគរបាលរបស់ពួកគេថា ក្រោយមកពួកគេ ត្រូវបានគេចាប់រំលោភបូក។

ចាប់តាំងពីពេលនោះមក ករណីជាច្រើនរបស់ស្រ្តី បានក្លាយជាគោលដៅដោយចេតនានៃអំពើហិង្សាផ្លូវភេទ នៅក្នុងជម្លោះដែលបណ្តាលឲ្យមនុស្សជាង ១៨០នាក់ស្លាប់ និងមនុស្សរាប់ម៉ឺននាក់ផ្សេងទៀត រត់ភៀសខ្លួនចេញពីផ្ទះសម្បែងរបស់ពួកគេ៕