អន្តរជាតិ៖ ក្រុមគ្រួសារនៅភាគខាងជើងតំបន់ហ្គាហ្សា ដែលបានជម្លៀសខ្លួនចេញពីការទម្លាក់គ្រាប់បែកដ៏ខ្លាំងក្លាបំផុតក្នុងរយៈពេលជាច្រើនឆ្នាំកន្លងមកនេះរបស់អ៊ីស្រាអែល បានវិលត្រឡប់មកកាន់ផ្ទះសម្បែងរបស់ពួកគេវិញហើយ នៅព្រឹកថ្ងៃសុក្រនេះ ដើម្បីពិនិត្យមើលផលខូចខាត ក្រោយបទឈប់បាញ់ ចូលជាធរមាន។
ទំហំនៃការខូចខាតនៅទីក្រុងភាគខាងជើង បេត ហានូន ច្រើនលើសពីការស្មាន ក្នុងនោះ អគាររងការបំផ្លិចបំផ្លាញគ្មានសល់ ហេដ្ឋារចនាសម្ព័ន្ធខូចខាតខ្ទេចខ្ទី ហើយគ្រឿងសង្ហារឹម រាយប៉ាយពាសពេញផ្លូវ។
ជនប៉ាឡេស្ទីនទាំងនេះ នាំគ្នាបោសសំអាតគំនរបាក់បែកចេញពីអគារផ្ទះល្វែង ដែលរងការវាយប្រហារតាមច្រកអាកាសរបស់អ៊ីស្រាអែល។
កន្លែងផ្សេងទៀតនៅក្នុងតំបន់ហ្គាហ្សា ជនប៉ាឡេស្ទីន នាំគ្នាប្រកាសជ័យជំនះ ប៉ុន្តែ អ្នកស្រុកមួយចំនួន ដែលបានបាត់បង់សមាជិកគ្រួសារ និងផ្ទះសម្បែងពួកគេ ហាក់មិនសូវសប្បាយចិត្តប៉ុន្មាននោះទេ។
គួរឲ្យដឹងថា សង្គ្រាមរយៈពេល ១១ថ្ងៃ នៅតំបន់ហ្គាហ្សា បានសម្លាប់ជនប៉ាឡេស្ទីនជាង ២០០នាក់ និងធ្វើការខូចខាតមានលក្ខណៈទ្រង់ទ្រាយធំ នៅក្នុងតំបន់គ្រប់គ្រងដោយក្រុមឧទ្ទាមហាម៉ាស់ ដែលក្រីក្ររួចទៅហើយ។
ប៉ុន្តែ ការវាយប្រហារដោយគ្រាប់រ៉ុកកែត ដែលបានសម្លាប់មនុស្ស ១២នាក់ នៅអ៊ីស្រាអែលនោះ ត្រូវបានជនប៉ាឡេស្ទីន មើលឃើញថាជាឆ្លើយតបដ៏ស័ក្តិសមមួយចំពោះការបំពានរបស់អ៊ីស្រាអែល នៅក្នុងទីក្រុងហ្ស៊េរុយសាឡឹម ដែលជាចំណុចកណ្តាលនាំឲ្យផ្ទុះជម្លោះមួយនេះ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
