ភ្នំពេញ៖ អាជ្ញាធរមូលដ្ឋាននៅក្នុងរាជធានីភ្នំពេញ បានប្តេជ្ញាថា ​នឹងបង្កើនការផ្តល់សេវា ដោះស្រាយសំណូមពរពលរដ្ឋ អភិវឌ្ឍន៍មូលដ្ឋាន ​និងការពារសុខសុវត្ថិភាពជូនពលរដ្ឋ ឲ្យបានលឿន ​និងមានតម្លាភាពអាចទទួលយកបាន។

នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌមានជ័យ​ រាជធានីភ្នំពេញ អាណត្តិទី៣ ​នៅថ្ងៃទី៩ ខែសីហានេះ លោក ហែម ដារិទ្ធ អភិបាលនៃគណៈអភិបាលខ័ណ្ឌ ​មានជ័យ បានថ្លែងថា ​នៅក្នុងវេទិកាផ្សព្វផ្សាយ ​ពិគ្រោះយោបល់ជាមួយអាជ្ញាធរសង្កាត់ និងពលរដ្ឋ​នៅតាមបណ្តា​សង្កាត់នានា នាពេលនេះ រដ្ឋបាលខ័ណ្ឌមានជ័យ ​ក៏ដូចបណ្តាខណ្ឌនានាដែរ គឺបានទទួលមតិយោបល់​ សំណើរសំណូមពរជាច្រើន ​ពីបណ្តាប្រជាពលរដ្ឋ ​ឲ្យធ្វើការដោះស្រាយ នៅក្នុងមូលដ្ឋាន​ ដូចជាកិច្ចការបង្កើនសកម្មភាពអនុវត្តគោលនយោបាយភូមិសង្កាត់​មានសុវត្ថិភាព រៀបចំសន្តិសុខ ​សណ្តាប់ធ្នាប់​ ការអភិវឌ្ឍផ្លូវ ​ដាក់លូ ​ដោះស្រាយបញ្ហាទឹកលិច និងការពន្លឿន​ការងារ​ផ្តល់​សេវាសាធារណៈមួយចំនួនទៀត​ ដែលមានភាពយឺតយ៉ាវជាដើម។

ពលរដ្ឋខណ្ឌមានជ័យថ្លែងថា ជាទូទៅ​ រាល់មតិយោបល់ ​សំណើរ ​និងសំណូមពរ ដែលពលរដ្ឋ បានដាក់ជូនទៅរដ្ឋបាលខ័ណ្ឌ ​គឺត្រូវបានទទួលយកទៅពិនិត្យពិចារណា ​រួមគ្នាដោះស្រាយ និងបានធ្វើឲ្យពលរដ្ឋរស់នៅប្រកបដោយសុខសន្តិភាព ​មានការអភិវឌ្ឍន៍រីកចំរើន​ ហើយ កន្លែង​ដែល​មិនទាន់ដោះស្រាយ​ អភិវឌ្ឍន៍ គឺបានរៀបចំ​គឺបានបញ្ចូលក្នុងគម្រោងផែនការ​សកម្មភាព​អភិវឌ្ឍន៍​នៅ​ពេលបន្តបន្ទាប់គ្នានេះ។

លោក អែម សុខលាង ប្រធានក្រុមប្រឹក្សាខណ្ឌមានជ័យ បានថ្លែងថា ការ​រៀបចំ​វេទិកាផ្សព្វផ្សាយ​ពិគ្រោះ​យោបល់អភិវឌ្ឍមូលដ្ឋាននេះ ​គឺធ្វើឡើងស្របតាមមាត្រា៦៦​ នៃអនុក្រិត្យ២១៥ ក្នុងគោល​បំណង ដោះស្រាយ​ និងឆ្លើយតបរាល់បញ្ហាអាទិភាពរបស់ពលរដ្ឋមូលដ្ឋាន និង​ជំរុញគ្រប់គ្រប់​អ្នក​ពាក់ព័ន្ធក្នុងមូលដ្ឋាន​ចូលរួមដំណើរការអភិវឌ្ឍតាមប្រជាធិបតេយ្យ៕អត្ថបទ ស៊ុម សុខជា