អន្តរជាតិ៖ មន្ត្រីជាន់ខ្ពស់មួយរូបរបស់ក្រុមឧទ្ទាមហាម៉ាស់ លោក ខាលីល អាល់ ហាយយ៉ា នៅថ្ងៃសុក្រនេះ បានចូលរួមជាមួយក្រុមអ្នកគាំទ្រ ដើម្បីអបអរបទឈប់បាញ់ជាមួយអ៊ីស្រាអែល និងបានចាត់ទុកថា វាគឺជាជ័យជំនះចំពោះចលនារបស់លោក។
លោកមិនបានប្រកាសឲ្យដឹងពីលក្ខន្តិកៈ នៃកិច្ចព្រមព្រៀងនេះឡើយ ហើយលោកអះអាងថា អ៊ីស្រាអែល មិនបានបំផ្លិចបំផ្លាញហេដ្ឋារចនាសម្ព័ន្ធយោធាក្រុមហាម៉ាស់នោះទេ។
សំឡេងអបអរសាទរ និងសំឡេងផ្លុំកញ្ចែ បានបន្លឺឡើងនៅទូទាំងទីក្រុងហ្គាហ្សា ស្របពេលដែលបទឈប់បាញ់រវាងអ៊ីស្រាអែល និងក្រុមហាម៉ាស់ បានចូលជាធរមាននៅវេលាម៉ោង ២យប់រំលងអាធ្រាត្រឈានចូលព្រឹកថ្ងៃសុក្រ ម៉ោងក្នុងស្រុក។
នៅទូទាំងតំបន់ហ្គាហ្សាស្ទ្រីប ក្រុមអ្នកស្រុកនាំគ្នាដើរដង្ហែក្បួនតាមដងផ្លូវ ដើម្បីអបអរការបញ្ចប់ជម្លោះ ក្រោយសង្គ្រាមអស់រយៈពេល ១១ថ្ងៃ ដែលបណ្តាលឲ្យមនុស្ស រាប់រយនាក់ បាត់បង់អាយុជីវិត។
បទឈប់បាញ់ បានចូលជាធរមាន ក្រោយភាគីអ៊ីស្រាអែល និងក្រុមហាម៉ាស់ ទទួលយកសំណើររបស់អេហ្ស៊ីប ដើម្បីបញ្ចប់អំពើហិង្សា។
យោងតាមសេចក្តីរាយការណ៍ពីក្រសួងសុខភាពតំបន់ហ្គាហ្សា បានឲ្យដឹងថា ជនប៉ាឡេស្ទីន យ៉ាងហោច ២៣០នាក់ ត្រូវបានសម្លាប់ ក្នុងនោះ រួមមានកុមារ ៦៥នាក់ និងស្ត្រី ៣៩នាក់ ហើយនិងមនុស្ស ១.៧១០នាក់ បានរងរបួស។
ដោយឡែក មនុស្ស ១២នាក់ បានស្លាប់នៅក្នុងប្រទេសអ៊ីស្រាអែល រួមទាំងក្មេងប្រុសអាយុ ៥ឆ្នាំម្នាក់ និងក្មេងស្រីអាយុ ១៦ឆ្នាំម្នាក់ផងដែរ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
