ចិន ៖ សកម្មជនគាំទ្រលទ្ធិប្រជាធិបតេយ្យហុងកុង អ្នកនាង Anna Kwok បាននិយាយ នៅថ្ងៃពុធ (ទី៩ ខែសីហា) នេះថា ឪពុកម្តាយរបស់ខ្លួនត្រូវបាន«សាកសួរ បៀតបៀន និងបំភិតបំភ័យ» ដោយអាជ្ញាធរ ពោលគឺប៉ុន្មានសប្តាហ៍បន្ទាប់ពីមន្ត្រីបានចោទប្រកាន់លើអ្នកនាង និងមនុស្ស ៧នាក់ផ្សេងទៀតពីបទបង្កគ្រោះថ្នាក់ដល់សន្តិសុខជាតិ។

កាលពីខែមុន ក្រុងហុងកុងបានសម្រេចផ្តល់ប្រាក់រង្វាន់ចំនួន ១លានដុល្លារហុងកុង (១២៨.០០០ដុល្លារអាមេរិក) សម្រាប់អ្នកផ្ដល់ព័ត៌មាន ដែលអាចនាំទៅដល់ការចាប់ខ្លួនសកម្មជនប្រជាធិបតេយ្យដ៏លេចធ្លោចំនួន ៨នាក់ ដែលឥឡូវនេះកំពុងរស់នៅក្រៅប្រទេស ដោយចោទប្រកាន់ពួកគេពីបទវិទ្ធង្សនា ការឃុបឃិតជាមួយបរទេស និងអំពើឧក្រិដ្ឋកម្មផ្សេងទៀត។

នគរបាលក្រុងហុងកុងបានបញ្ជាក់ប្រាប់សារព័ត៌មាន AFP ថា នាយកដ្ឋានសន្តិសុខជាតិ កាលពីថ្ងៃអង្គារ (ទី៨ ខែសីហា) បាននាំខ្លួនបុរសម្នាក់ និងស្ត្រីម្នាក់ ដើម្បីសាកសួរ សម្រាប់ការស៊ើបអង្កេត ពាក់ព័ន្ធនឹងឧក្រិដ្ឋកម្មសន្តិសុខជាតិ តែមិនបញ្ចេញឈ្មោះអ្នកទាំង២ នោះទេ។

លោកស្រី Kwok នាយកប្រតិបត្តិនៃក្រុមប្រឹក្សាប្រជាធិបតេយ្យហុងកុងមិនរកប្រាក់កម្រៃ នៅថ្ងៃពុធនេះ បានសុំទោសដល់ឪពុកម្តាយរបស់ខ្លួន ក្នុងសេចក្តីថ្លែងការណ៍មួយ សម្រាប់ការណ៍ដែលធ្វើឲ្យអ្នកមានគុណរបស់ខ្លួនមានពាក់ព័ន្ធនឹងករណីនេះ។

គួរបញ្ជាក់ដែរថា ក្នុងរយៈពេលប៉ុន្មានសប្តាហ៍កន្លងមកនេះ សមាជិកគ្រួសាររបស់សកម្មជនដែលត្រូវតាមចាប់ខ្លួនយ៉ាងតិច ៤នាក់ផ្សេងទៀត ដែលរួមមានអតីតសមាជិកសភា លោក Nathan Law សមាជិកសហជីពលោក Mung Siu-tat មេធាវីលោក Dennis Kwok និងសកម្មជនលោក Elmer Yuen សុទ្ធតែត្រូវបាននគរបាលនាំខ្លួនទៅសាកសួរដូចគ្នា៕