រដ្ឋមន្ត្រីការបរទេសអ៊ីរ៉ង់ លោក Hossein Amirabdollahian កាលពីថ្ងៃអង្គារ (ទី៨ ខែសីហា) បានអំពាវនាវឲ្យមានកិច្ចសហប្រតិបត្តិការ រវាងប្រទេសអ៊ីរ៉ង់ និងបណ្តាប្រទេសប្លុក BRICS។

ថ្លែងនៅឯកិច្ចប្រជុំ រវាងប្លុក BRICS និងប្រទេសអ៊ីរ៉ង់ ដែលមានឈ្មោះថា ទស្សនវិស័យ សម្រាប់ភាពជាដៃគូ និងកិច្ចសហប្រតិបត្តិការ (Perspectives for Partnership and Cooperation) នៅទីក្រុងតេអេរ៉ង់ លោក Amirabdollahian បានបង្ហាញពីសារៈសំខាន់នៃទីតាំងភូមិសាស្ត្រ ធនធានថាមពល និងកម្លាំងពលកម្មជំនាញវ័យក្មេងរបស់ប្រទេស ដែលជាចំណុចខ្លាំង ក្នុងការរួមចំណែកដល់ការក្លាយជា «ដៃគូដែលអាចទុកចិត្តបាន និងមានប្រសិទ្ធភាព ក្នុងកិច្ចសហប្រតិបត្តិការទាំងទ្វេភាគី និងពហុភាគី»។

ជាមួយគ្នានេះ លោកក៏បានបន្ថែមដែរថា អ៊ីរ៉ង់ស្វាគមន៍រាល់គំនិតផ្តួចផ្តើមដែលជួយដល់ការលើកលែងនូវទណ្ឌកម្មឯកតោភាគី និងខុសច្បាប់របស់អាមេរិកប្រឆាំងនឹងអ៊ីរ៉ង់។

កាលពីថ្ងៃអង្គារនោះដែរ ប្រទេសរុស្ស៊ីបានយល់ស្របជាមួយអ៊ីរ៉ង់ដែលជាសម្ព័ន្ធមិត្តរបស់ខ្លួន ក្នុងការបដិសេធការប៉ុនប៉ងរបស់លោកខាងលិច ដែលបន្តរារាំងអ៊ីរ៉ង់ ទោះបីជាមានការដួលរលំកិច្ចព្រមព្រៀងឆ្នាំ២០១៥ ដែលមានបំណងទប់ស្កាត់កម្មវិធីនុយក្លេអ៊ែររបស់ទីក្រុងតេអេរ៉ង់ ជាថ្នូរនឹងការបន្ធូរបន្ថយទណ្ឌកម្មក៏ដោយ៕