ទីក្រុង Yakutskដែលជាត្រជាក់ជាងគេបំផុតរបស់រុស្ស៊ី ឈ្លក់ផ្សែងពុលបង្កឡើងដោយសារភ្លើងឆេះព្រៃ ស្របពេលដែលភ្លើងឆេះព្រៃជាង ១០០កន្លែង កំពុងឆាបឆេះនៅក្នុងសាធារណរដ្ឋចុងបូព៌ា Sakha។

ភ្លើងឆេះព្រៃនៅរដូវក្តៅ កើតឡើងប្រចាំឆ្នាំក្នុងសាធារណរដ្ឋ Sakha ជាតំបន់ធំបំផុត និងត្រជាក់បំផុតរបស់រុស្ស៊ី ប៉ុន្តែហេតុការណ៍ទាំងនេះ កាន់តែធ្ងន់ធ្ងរក្នុងរយៈពេលប៉ុន្មានឆ្នាំចុងក្រោយនេះ ដោយសារតំបន់អាក់ទិករបស់រុស្ស៊ី ឡើងកម្តៅលឿនជាងមធ្យមភាគពិភពលោកចំនួន ២ដង។

លោក Aksinya Kanglassvaគឺជាពលរដ្ឋមួយរូបរស់នៅទីក្រុង Yakutskដែលជារដ្ឋធានីនៃសាធារណរដ្ឋ Sakha និយាយថា លោកត្រូវតែពាក់ម៉ាស់ ដើម្បីអាចដកដង្ហើមបានស្រួលជាងនេះ ពីព្រោះថាវាពិតជាពិបាកដកដង្ហើមខ្លាំងណាស់។

ចំណែកឯពលរដ្ឋមួយរូបទៀតលោក Lyubov Kolesovaនិយាយដែរថា វាពិតជាណែនទ្រូងខ្លាំងណាស់នៅពេលឥឡូវនេះ ។ លោកធ្លាប់តែបើកបង្អួចផ្ទះ ប៉ុន្តែឥឡូវដោយសារតែផ្សែងពុល ពួកយើងមិនអាចបើកបង្អួចបានទៀតទេនៅក្នុងផ្ទះ ឬនៅក្នុងរថយន្ត ហើយអ្នកដែលមានកង្ហា និងម៉ាស៊ីនត្រជាក់ បានស្រួលជាង។

ខណៈពេលនោះដែរ អនុរដ្ឋមន្រ្តីក្រសួងរុក្ខា និងអេកូឡូស៊ីនៅតំបន់ Yakutia លោក Andrei Konoplyov និយាយថា យោងតាមព័ត៌មានចុងក្រោយបានឲ្យដឹងថា នៅពេលឥឡូវនេះ មានភ្លើងឆេះព្រៃ ១១១កន្លែងនៅក្នុងសាធារណរដ្ឋ Sakha របស់ពួកយើង គ្របដណ្តប់លើដៃព្រៃ ១៨ម៉ឺនហិចតា។ 

លោកបន្តថា បច្ចុប្បន្ន ពួកយើងកំពុងព្យាយាមពន្លត់ភ្លើងឆេះព្រៃ ៥៣កន្លែង ដែលគ្របដណ្តប់លើផ្ទៃដីព្រៃ ១៥ម៉ឺនហិចតា។ ស្ថានភាពដែលអាក្រក់ជាងគេបំផុតស្ថិតនៅស្រុក Ust-Maysky, Allaikhovsky និងស្រុក Aldanskyហើយក្រុមភ្នាក់ងារពន្លត់អគ្គិភ័យជាង ១.២០០នាក់ ត្រូវបានដាក់ពង្រាយដើម្បីពន្លត់ភ្លើងឆេះព្រៃ ៕