ភ្នំពេញ ៖សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា នឹងដឹកនាំជំនួបសំណេះសំណាលជាមួយសមាជិករាជរដ្ឋាភិបាលក្នុងអាណត្តិចាស់ និងសមាជិករាជរដ្ឋាភិបាលអាណត្តិថ្មីនៅ​ថ្ងៃទី ១០ ខែសីហាស្អែកនេះ ទីស្តីការគណបក្សប្រជាជនកម្ពុជា វិមាន៧មករា រាជធានីភ្នំពេញ ដើម្បីចែករំលែកបទពិសោធន៍ការងារដឹកនាំរដ្ឋាភិបាលជូន សមាសភាពក្បាលម៉ាស៊ីនដឹកនាំរាជរដ្ឋាភិបាលថ្មី។

ឯកឧត្តម សុខ ឥសាន អ្នកនាំពាក្យគណបក្សប្រជាជនក្ពុជាថ្លែងប្រាប់ព័ត៌មានក្នុងស្រុកថា ការជួបសំណេះសំណាលនេះក្នុងគោលបំណងចែករំលែកបទពិសោធន៍ការងារដឹកនាំរដ្ឋាភិបាលពីមន្រ្ដីចាស់ៗ ជូនសមាសភាពក្បាលម៉ាស៊ីនដឹកនាំរាជរដ្ឋាភិបាលថ្មីដែលសុទ្ធសឹងជាមនុស្សថ្មី និងមានវ័យក្មេង។

ឯកឧត្តមបន្តថា ជំនួបរវាងថា្នក់ដឹកនាំរាជរដ្ឋាភិបាលចាស់ និងថ្នាក់ដឹកនាំរាជរដ្ឋាភិបាលថ្មីនេះស្ថិតនៅក្នុងពេលអន្តរកាលនៃការផ្ទេរពីនីតិកាលមួយទៅនីតិកាលមួយទៀត ជាពិសេសជាការជួបសំណេះសំណាលនេះដើម្បីឱ្យសមាសភាពគណៈរដ្ឋមន្ត្រីថ្មីយល់ដឹងពីកិច្ចការមួយចំនួនដែលត្រូវធ្វើនៅពេលខាងមុខ។

បើតាមសាររបស់សម្ដេចតេជោ ហ៊ុន សែន គិតត្រឹមថ្ងៃទី៩ ខែសីហានេះសម្ដេចនឹងបន្តធ្វើជានាយករដ្ឋមន្ត្រីរយៈពេល ១៣ ថ្ងៃទៀតប៉ុណ្ណោះ ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត និងត្រូវឡើងកាន់តំណែងជានាយករដ្ឋមន្រ្ដីថ្មីជាផ្លូវការ ខណៈដែលសម្ដេចនឹងឡើងឋានៈទៅជាឪពុកនាយករដ្ឋមន្ត្រីម្តង។

សូមជម្រាបថារដ្ឋសភាជាតិនឹងបើកសម័យប្រជុំលើក១ និងលើកដំបូង នាថ្ងៃទី២១ និងថ្ងៃទី២២ ខែសីហា ឆ្នាំ២០២៣ ក្រោមព្រះរាជវត្តមានដ៏ខ្ពង់ខ្ពស់បំផុតរបស់ព្រះករុណា ព្រះបាទសម្តេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា រួមជាមួយសមាជិកសមាជិកាសភាសរុប ១២៥ រូប ដើម្បីបោះឆ្នោតផ្តល់សេចក្តីទុកចិត្តលើការរៀបចំរាជរដ្ឋាភិបាលនីតិកាលទី៧នេះ៕

អត្ថបទ៖ វ៉ន ដារ៉ា