កំពង់ឆ្នាំង៖ នៅព្រឹកថ្ងៃទី១០ ខែសីហា ឆ្នាំ២០២៣ ឯកឧត្តមនាយឧត្តមសេនីយ៍ ឯក មនោសែន អនុ​ប្រធានបណ្ឌិត្យសភានគរបាលកម្ពុជា និងជាប្រធាននាយកដ្ឋានបណ្តុះបណ្តាល បាន​ជំរុញ​អោយ​សិស្ស​នាយនគរបាល និងនាយនគរបាលរងក្របខណ្ឌថ្មីខិតខំសិក្សា ហ្វឹកហាត់ ដោយ​ធ្វើ​ស្វ័យ​សិក្សា​ទាំងទ្រឹស្ដី និងការអនុវត្តជាក់ស្ដែង មានវត្តមានគ្រប់ពេលសិក្សា និងពេលប្រជុំជួរ និង​គោរព​វិន័យឱ្យបានខ្ជាប់ខ្ជួននិងហាមដាច់ខាត ដើម្បី​ក្លាយ​ខ្លួន​ជា​មន្ត្រី​នគរបាល​ដែល​មាន​គុណភាព​សំរាប់ប្រទេសជាតិ។

ឯកឧត្តមនាយឧត្តមសេនីយ៍ ឯក មនោសែន បានបន្តថា សិស្ស នាយនគរបាល ​និង​សិស្ស​នាយ​នគរបាល​រង ក្របខណ្ឌថ្មីចំនួន១៩៥នាក់ សិក្សារយៈពេល៤ខែ ដែល​ជាវគ្គ​បណ្តុះបណ្តាល​ប្រវត្តិសាស្រ្ត​ដ៏សំខាន់ និងចាំបាច់នៅក្នុងឆាកជីវិតរបស់ប្អូនៗ ដោយបាន​ផ្លាស់ប្តូរ​ជីវភាព​ការងារ​របស់ប្អូនៗ​ពីជនស៊ីវិល មកជាកងកម្លាំងនគរបាលជាតិ។ បណ្ឌិត្យសភានគរបាលកម្ពុជា បាន​ដាក់​ចេញ​នូវកម្មវិធីកំណែទម្រង់លើការងារសំខាន់ៗរួមមាន ការងារដឹក-គ្រប់គ្រង ការអភិវឌ្ឍ​កម្មវិធីអប់រំ ការអភិវឌ្ឍសមត្ថភាពគ្រូបង្រៀន ការពង្រឹងវិន័យនិស្សិត-សិក្ខាកាម សិស្ស​នាយ​នគរបាល និងសិស្សនាយ នគរបាលរង ការអភិវឌ្ឍធនធានមនុស្ស ការបង្កើត​ឱ្យ​មាន​យន្ត​ការ​ធានា​គុណភាពអប់រំផ្ទៃក្នុង ការបង្កើតឱ្យមានវប្បធម៌ គុណភាព ការអភិវឌ្ឍ​ហេដ្ឋា​រចនា​សម្ព័ន្ធ​ និង​សម្ភារ​សិក្សា ការពង្រឹងសមត្ថភាពស្រាវជ្រាវវិទ្យាសាស្ត្រនគរបាល និងការ​ពង្រឹង​ពង្រីក​កិច្ច​សហ​ប្រតិបត្តិការ​ជាតិ និង​អន្តរជាតិ សំដៅលើកកម្ពស់គុណភាពអប់រំបណ្ដុះបណ្តាល ព្រមទាំងឆ្លើយ​តប​ទៅ​នឹង​តម្រូ​វការអង្គភាពប្រើប្រាស់កងកម្លាំងនគរបាលជាតិ ស្របតាមទិស​ដៅ​របស់​ក្រសួង​មហាផ្ទៃ និងគោលនយោបាយកំណែទម្រង់កងកម្លាំងប្រដាប់អាវុធរបស់រាជរដ្ឋាភិបាល ដែល​មាន​សម្តេច​អគ្គ​មហាសេនាបតីតេជោ ហ៊ុន សែន ជានាយករដ្ឋមន្ត្រី ដ៏ឆ្នើមនៃយើងទាំងអស់គ្នា។

ឯកឧត្តមនាយឧត្តមសេនីយ៍ បានផ្ដល់អនុសាសន៍ដល់សិស្សនគរបាលគ្រប់រូប ត្រូវយក​ចិត្ត​ទុក​ដាក់​សិក្សា​រៀនសូត្រ ហ្វឹកហាត់ ដោយធ្វើស្វ័យសិក្សាទាំងទ្រឹស្ដី និងការអនុវត្តជាក់ស្ដែង មានវត្ត​មាន​គ្រប់​ពេលសិក្សា និងពេលប្រជុំជួរ និងគោរពវិន័យឱ្យបានខ្ជាប់ខ្ជួន និងហាមដាច់​ខាត​ចំពោះ​ការ​ប្រព្រឹត្ត​នូវសកម្មភាពខុសច្បាប់នានាផងដែរ៕ អត្ថបទ៖ កាំង ហុងវាស្នា