ការកត់សម្គាល់របស់លោក Taro Aso កាលពីថ្ងៃអង្គារ (ទី៨ ខែសីហា) គឺស្របតាមជំហរផ្លូវការរបស់ទីក្រុងតូក្យូ ដោយអតីតនាយករដ្ឋមន្ត្រីជប៉ុនរូបនេះ បានលើកឡើងថា ប្រទេសរបស់លោក ត្រូវតែបង្ហាញនូវ «ភាពមិនរួញរា ក្នុងការប្រយុទ្ធ» ដើម្បីការពារកោះតៃវ៉ាន់ពីការវាយប្រហារ។

លោក Aso អនុប្រធានគណបក្សប្រជាធិបតេយ្យសេរីនិយម (LDP) ដែលកំពុងកាន់អំណាច បាននិយាយនៅក្នុងទីក្រុងតៃប៉ិថា ប្រទេសជប៉ុន សហរដ្ឋអាមេរិក និងប្រទេសដទៃទៀត ត្រូវតែបង្ហាញការតាំងចិត្តយ៉ាងមុតមាំ ក្នុងការចូលមកការពារតៃវ៉ាន់ ប្រសិនបើកោះនេះត្រូវបានវាយប្រហារ ដោយបង្ហាញពីសញ្ញារារាំងប្រឆាំងនឹងប្រទេសចិន។

តែយ៉ាងណាក្ដី សុន្ទរកថារបស់លោក Aso បានធ្វើឲ្យមានការខឹងសម្បាពីប្រទេសចិន ដែលអះអាងថាតៃវ៉ាន់ជាទឹកដីរបស់ខ្លួន។ អ្នកនាំពាក្យក្រសួងការបរទេសចិន បាននិយាយកាលពីថ្ងៃពុធ (ទី៩ ខែសីហា) ថា ទីក្រុងប៉េកាំងជំរុញឲ្យប្រទេសជប៉ុនគោរពតាមគោលការណ៍ចិនតែមួយ និងបដិសេធមិនគាំទ្រកងកម្លាំងតៃវ៉ាន់ ដែលគាំទ្រឲ្យមានឯករាជ្យ ក្នុងគ្រប់មធ្យោបាយទាំងអស់។

ពាក់ព័ន្ធនឹងការលើកឡើងនេះ សមាជិកសភារបស់គណបក្ស LDP លោក Keisuke Suzuki ដែលអមដំណើរទស្សនកិច្ចរបស់លោក Aso នៅកោះតៃវ៉ាន់ ក្នុងសប្តាហ៍នេះ បានប្រាប់កម្មវិធីជជែករបស់ទូរទស្សន៍ BS Fuji កាលពីថ្ងៃពុធនោះថា លោក Aso បានពិភាក្សាបញ្ហានេះជាមួយមន្ត្រីរដ្ឋាភិបាលជប៉ុន ដោយបង្ហាញថា ទស្សនៈរបស់លោក Aso មិនបានងាកចេញពីជំហរផ្លូវការនោះទេ។

សូមបញ្ជាក់ថា ទស្សនកិច្ចរបស់លោក Aso ដែលជាការធ្វើទស្សនកិច្ចពីមន្ត្រីនយោបាយជាន់ខ្ពស់បំផុតរបស់ជប៉ុន នៅកោះតៃវ៉ាន់ គិតចាប់តាំងពីឆ្នាំ១៩៧២ នៅពេលដែលប្រទេសជប៉ុន បានបង្កើតទំនាក់ទំនងការទូត មានលក្ខណៈធម្មតាជាមួយចិននោះ បានកើតឡើង ក្នុងខណៈដែលភាពតានតឹង បានកើនឡើង ជុំវិញការគ្រប់គ្រងតាមបែបប្រជាធិបតេយ្យ នៅតៃវ៉ាន់ ចំពេលមានសម្ពាធយោធាកាន់តែខ្លាំងឡើងរបស់ចិននៅលើកោះនេះ អំឡុងរយៈពេល ៣ឆ្នាំកន្លងមកនេះ៕