អង្គការសហប្រជាជាតិ បាននិយាយកាលពីថ្ងៃពុធថា កិច្ចព្រមព្រៀងដែលUNសម្រេចបានជាមួយប្រទេសស៊ីរី ដើម្បីបើកច្រកព្រំដែនដ៏សំខាន់ឡើងវិញពីប្រទេសទួរគីទៅកាន់ភាគពាយព្យដែលកាន់កាប់ដោយពួកឧទ្ទាមសម្រាប់រយៈពេល៦ខែ «ការពារ»ឯករាជ្យភាពនៃប្រតិបត្តិការរបស់អង្គការសហប្រជាជាតិ និងអនុញ្ញាតឲ្យផ្តល់ជំនួយដល់គ្រប់ភាគី។

កិច្ចព្រមព្រៀងដែលត្រូវបានប្រកាសកាលពីយប់ថ្ងៃអង្គារ នឹងបើកឡើងវិញនូវច្រកបាប អាល់ ហាវ៉ា ( Bab al-Hawa) ដែលធ្លាប់បានប្រើប្រាស់សម្រាប់ការដឹកជញ្ជូនចំនួន៨៥ភាគរយទៅកាន់តំបន់អ៊ីដលីប (Idlib) ភាគពាយព្យ ដែលមានប្រជាជនប្រហែល៤,១លាននាក់រស់នៅ។

អ្នកនាំពាក្យរងរបស់UN លោក ហ្វាហាន ហាក (Farhan Haq) បាននិយាយថា អង្គការសហប្រជាជាតិបានត្រៀមខ្លួនរួចជាស្រេចក្នុងការបន្តប្រតិបត្តិការតាមច្រក បាប អាល់ ហាវ៉ា ឲ្យបានឆាប់តាមដែលអាចធ្វើទៅបាន ប៉ុន្តែវានឹងត្រូវការពេលវេលាខ្លះ ដើម្បីឲ្យរថយន្តដឹកទំនិញផ្លាស់ទី ហើយ«ខ្ញុំមិនរំពឹងថា នឹងមានអ្វីកើតឡើងនៅពីរបីថ្ងៃខាងមុខនេះទេ»។

ការឯកភាពគ្នារបស់អង្គការសហប្រជាជាតិ-ស៊ីរី ទៅលើច្រក បាប អាល់ ហាវ៉ា ដែលប្រកាសដោយលោកហាកកាលពីល្ងាចថ្ងៃអង្គារ បានធ្វើឡើងបន្ទាប់ពីការប្រកាសរបស់គាត់ នៅមុនថ្ងៃដែលស៊ីរីយល់ព្រមរក្សាច្រកឆ្លងកាត់ពីរផ្សេងទៀតទៅភាគពាយព្យគឺ បាប អាល់សាឡាមេ (Bab al-Salameh) និង អាល់ រ៉ៃ (al-Rai) បើកសម្រាប់រយៈពេលបីខែរហូតដល់ថ្ងៃទី១៣ ខែវិច្ឆិកា។