ខ្សែការពារក្លិបប្រេស៊ីល Fluminense, Marcelo ត្រូវបាន​សមាគ​ម​កីឡាបាល់ទាត់​អាមេរិក​ខាង​ត្បូង CONMEBOL សម្រេចដាក់ពិន័យមិនឱ្យចូលលេង ៣ ប្រកួត​ក្រោយ​បង្ករ​របួស​ធ្ងន់​ធ្ងរ​លើ​គូ​ប្រកួត​អំឡុង​ការប្រកួតនៅក្របខណ្ឌ Copa Libertadores សប្តាហ៍មុន។

កីឡាករវ័យ ៣៥ ឆ្នាំអតីតកីឡាកររបស់ Real Madrid រូបនេះក៏ត្រូវបានផាកពិន័យជាទឹកប្រាក់ ៦០០០ ដុល្លារផងដែរចំពោះកំហុសនេះ។

អំឡុងការប្រកួតនៃក្របខណ្ឌ Libertadors សប្តាហ៍មុន Marcelo បានធ្វើឱ្យខ្សែការពាររបស់ក្លិប Argentinos Juniors, Luciano Sanchez រងរបួសបាក់ជើងឆ្វេងគួរឱ្យរន្ធត់។

Marcelo ក្រោយមកបានបង្ហាញនៅលើបណ្តាញសង្គម Instagram របស់ខ្លួនថា “ខ្ញុំមាន​ពេល​វេលា​ដ៏​លំបា​កមួយនៅលើទីលាន កំហុស​ដែល​បង្ករ​ឡើង​ថ្ងៃ​នេះ​លើ​មិត្ត​រួម​អាជីព​ធ្វើ​ឱ្យ​ខ្ញុំ​មាន​ការ​សោក​ស្តាយ​”។

Marcelo ដែលបង្ករកំហុសដោយអចេតនានោះ ក៏ទទួលបានកាតក្រហមភ្លាមៗ តែ​មិន​បាន​បង្ហាញ​អារម្មណ៍ខឹង តវ៉ានឹងអាជ្ញាកណ្តាលឡើយ និងបានសម្រក់​ទឹកភ្នែកនៅ​លើ​ទីលាន​ក្រោយ​កំហុស​របស់ខ្លួ​នធ្វើឱ្យមិត្តរួមអាជីពរបួសធ្ងន់ធ្ងរបែបនេះ៕ អត្ថបទ៖នាង សុភាវុធ