ភ្នំពេញ៖ ការធ្វើពាណិជ្ជកម្មទៅកាន់ទីផ្សារអន្តរជាតិរបស់កម្ពុជា ក្នុងរយៈពេល ៧ខែ ឆ្នាំ២០២៣នេះ មាន​ទំហំទឹកប្រាក់សរុបជាង ២៧ ពាន់លានដុល្លារ ​ក្នុងនោះការនាំចេញទំនិញរបស់កម្ពុជា មានទឹកប្រាក់ជាង១៣ ពាន់លានដុល្លារ ​ខណៈការនាំចូលមានចំនួនជាង ១៤ ពាន់លានដុល្លារ។

អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ​បានបង្ហាញស្ថិតិពាណិជ្ជកម្ម នៃការធ្វើពាណិជ្ជកម្មទៅកាន់ទីផ្សារអន្តរជាតិរបស់កម្ពុជា នៅក្នុងរយៈពេល ៧ខែ ឆ្នាំ ២០២៣ នេះ, ក្នុងនោះចំពោះការធ្វើពាណិជ្ជកម្មទំនិញជាមួយ​ប្រទេសដៃគូរសំខាន់ៗចំនួន ២០ និងបណ្តាប្រទេស​មួយ​ចំនួនផ្សេងទៀត​ គិតជាទឹកប្រាក់សរុបមានចំនួនជាង​ ២៧ ពាន់លានដុល្លារ ថមថយចុះក្នុង​រង្វង់ប្រមាណជាង ១៥ ភាគរយ បើធៀបរយៈពេលដូចគ្នាឆ្នំា ២០២២ ។

ការនាំចេញទំនិញរបស់កម្ពុជា នៅក្នុងរយៈពេល ៧ខែ នេះ មានទំហំទឹកជាង ១៣ពាន់លានដុល្លារ ថយចុះជិត ២ ភាគរយ បើធៀបរយៈពេលដូចគ្នាឆ្នំា ២០២២, ចំណែកប្រទេសសំខាន់ៗ​ដែលកម្ពុជា​នាំចេញមាន៖ សហរដ្ឋអាមេរិក មានទឹកប្រាក់ជាង ​៥ពាន់លានដុល្លារ, វៀតណាមជាង ១,៥ពាន់លានដុល្លារ, ចិន ៨១៤ លានដុល្លារ, ជប៉ុន ៥៦៦ លានដុល្លារ, ថៃជាង ៥៧៥ លានដុល្លារ, អាល្លឺម៉ង់ ៥១១ លានដុល្លារ, កាណាដា ៤៩៦ លានដុល្លារ, សិង្ហបុរីជាង ៤៤៨ លានដុល្លារ, និងការនាំចេញទៅកាន់ប្រទេសផ្សេងៗជាច្រើនទៀត។

ចំណែកការទំនិញនាំចេញនៅក្នុងរយៈពេលនេះដែររួមមាន៖ ការនាំចេញ​សំលៀកបំពាក់ និង​គ្រឿងបន្ទាប់បន្សំធ្វើពីក្រណាត់ មានទឹកប្រាក់ជាង ៣ពាន់លានដុល្លារ, ម៉ាស៊ីន ​គ្រឿងអេឡិចត្រូនិក និងគ្រឿងបង្គុំផ្សេងជិត ២ ពាន់លានដុល្លារ, សំលៀកបំពាក់ និងគ្រឿងបន្ទាប់បន្សំធ្វើពីក្រណាត់ ជាង ១,៤ពាន់លានដុល្លារ, វត្ថុធ្វើពីស្បែក​ វត្ថុធ្វើពីរោម គ្រឿងប្រដាប់ប្រដារសម្រាប់ធ្វើដំណើរ និង​បរិក្ខាផ្សេងៗ មានទឹកប្រាក់ជាង ១ពាន់លានដុល្លារ ក្រៅពីនេះកម្ពុជាក៏បាននាំចេញមុខទំនិញ​សំខាន់ៗ​ជាច្រើនទៀតដូចជា​ ធញ្ញជាតិ, ស្បែកជើង ស្រោមជើង, គ្រឿងសង្ហា រឹម, កៅស៊ូ, និងផ្លែឈើជាដើម ។

ចំណែកការនាំចូលវិញ សម្រាប់រយៈពេល ៧ខែនេះដែរ ការនាំចូលទំនិញមកទីផ្សារកម្ពុជា មាន​ទំហំទឹកប្រាក់ជាង ១៤ពាន់លានដុល្លារ ថមថយចុះជាង​ ២៥ ភាគរយ ក្នុងនោះ​ចំពោះទំនិញ​នាំចូលរួមមាន៖ ការនាំចូលពីចិនមកកម្ពុជា មានទឹកប្រាក់ជាង ៦,២ ពាន់លានដុល្លារ, វៀតណាមជាង ២ ១២៧ លានដុល្លារ, ថៃ ១,៦ពាន់លានដុល្លារ, ឥណ្ឌូនេស៊ី ៦៤៧ លានដុល្លារ, សិង្ហបុរី ៤៤៣ លានដុល្លារ ​ក្រៅពីនេះ​កម្ពុជា​ក៏បាន​នាំចូលទំនិញ​ផ្សេងៗ​ពី​ប្រទេសជាច្រើនទៀត​ផងដែរ៕ អត្ថបទ៖ សុន រ៉ាឌី