អាជ្ញាធរទេសចរណ៍របស់ប្រទេសចិន បាននិយាយកាលពីថ្ងៃព្រហស្បតិ៍ (ទី១០ ខែសីហា) ថា ពួកគេបានសម្រេចចិត្តលុបចោលបម្រាមធ្វើដំណើរជាក្រុមទៅកាន់ប្រទេសកូរ៉េខាងត្បូង ដោយការប្រកាសនេះ បានបញ្ចប់ការផ្អាករយៈពេល ៦ឆ្នាំ ដែលបណ្តាលមកពីទំនាក់ទំនងប្រេះស្រាំ បន្ទាប់ពីមានការដាក់ពង្រាយប្រព័ន្ធការពារដែនអាកាសរបស់សហរដ្ឋអាមេរិកទៅកាន់ភាគខាងត្បូង។

នៅព្រឹកថ្ងៃដដែលនោះ ក្រសួងវប្បធម៌ និងទេសចរណ៍ចិន បានប្រកាសថា ខ្លួននឹងអនុញ្ញាតឲ្យមានដំណើរទេសចរណ៍ជាក្រុមទៅកាន់ប្រទេសចំនួន៧៨ ក្នុងនោះរួមទាំងកូរ៉េខាងត្បូង សហរដ្ឋអាមេរិក និងប្រទេសជប៉ុនផងដែរ។

ក្នុងខែមករា និងខែមីនា ប្រទេសចិនបានលុបចោលការហាមឃាត់ទេសចរណ៍ជាក្រុមលើប្រទេសចំនួន ៦០ ស្របតាមការបន្ធូរបន្ថយគោលនយោបាយទប់ស្កាត់ជំងឺរាតត្បាតរបស់ខ្លួន ប៉ុន្តែកូរ៉េខាងត្បូង មិនត្រូវបានរាប់បញ្ចូលទេ ជាការសម្រេចមួយ ដែលត្រូវបានគេមើលឃើញយ៉ាងទូលំទូលាយថា ជាការបង្ហាញនូវជម្លោះដែលមិនទាន់ដោះស្រាយរបស់ទីក្រុងប៉េកាំង ជុំវិញវិធានការប្រឆាំងវីរុសកូរ៉ូណាកាលពីពេលមុនរបស់ទីក្រុងសេអ៊ូល ដែលធ្វើចំពោះអ្នកដំណើរចូលមកពីចិន។

នៅពេលដែលត្រូវបានសួរអំពីជំហររបស់ខ្លួនលើវិធានការចុងក្រោយរបស់ទីក្រុងប៉េកាំង ក្នុងនោះរួមទាំងបញ្ហានៃការសម្រួលទិដ្ឋាការទេសចរណ៍ សម្រាប់ជនជាតិកូរ៉េខាងត្បូងផងដែរនោះ ក្រសួងការបរទេសរបស់ទីក្រុងសេអ៊ូល បានឆ្លើយតបថា បច្ចុប្បន្នខ្លួនកំពុងទាក់ទងជាមួយប្រទេសចិន តាមរយៈទំនាក់ទំនងការទូត ។

គួរបញ្ជាក់ដែរថា ដំណើរទេសចរណ៍ជាក្រុមរបស់ចិនទៅកាន់កូរ៉េខាងត្បូង ស្ទើរតែត្រូវបានផ្អាកទាំងស្រុង ចាប់តាំងពីខែមីនា ឆ្នាំ២០១៧ ដោយសារមានជម្លោះទ្វេភាគី ជុំវិញការដាក់ពង្រាយខែលការពាររបស់សហរដ្ឋអាមេរិក ជាប្រព័ន្ធការពារដែនអាកាសរយៈកម្ពស់ខ្ពស់ (THAAD) ដែលទីក្រុងប៉េកាំងមើលឃើញថា ជាការគំរាមកំហែងផ្នែកសន្តិសុខ៕