អ្នកជំនាញអាកាសធាតុ និងអគ្គិភ័យ កាលពីថ្ងៃព្រហស្បតិ៍ (ទី១០ ខែសីហា) បាននិយាយថា ភាពធ្ងន់ធ្ងរនៃចំហេះព្រៃនៅលើកោះ Maui របស់រដ្ឋហាវ៉ៃ សហរដ្ឋអាមេរិក ដែលបានសម្លាប់មនុស្សចំនួន ៥៣នាក់ និងបង្ខំឲ្យមនុស្សរាប់ពាន់នាក់ត្រូវជម្លៀសចេញនោះ បណ្តាលមកពីចំណុចប្រសព្វនៃស្ថានភាពអាកាសធាតុក្ដៅហួតហែង ការរាតត្បាតពីរុក្ខជាតិបង្កគ្រោះថ្នាក់ និងភាពងាយរងគ្រោះជាពិសេស ដែលបង្កឡើងដោយសណ្ឋានដីនៃឆ្នេរសមុទ្រភាគខាងលិចរបស់កោះ Maui។

មូលហេតុពិតប្រាកដនៃអគ្គិភ័យ ដែលបានចាប់ផ្តើម កាលពីយប់ថ្ងៃអង្គារ (ទី៨ ខែសីហា) មិនទាន់កំណត់បាននៅឡើយទេ។ តែទោះបីជាយ៉ាងណាក៏ដោយ សេវាអាកាសធាតុជាតិ បានចេញការព្រមាន សម្រាប់កោះហាវ៉ៃពីការមានខ្យល់បក់បោកខ្លាំង និងអាកាសធាតុក្ដៅហួតហែង ដែលជាលក្ខខណ្ឌក្ដៅងំសម្រាប់ចំហេះព្រៃ ខណៈដែលខ្យល់ព្យុះសង្ឃរា Dora បានបោកបក់ភាគខាងត្បូងនៃកោះបន្តបន្ទាប់គ្នា នៅមហាសមុទ្រប៉ាស៊ីហ្វិក។

លោក Craig Clements សាស្ត្រាចារ្យឧតុនិយម នៅសកលវិទ្យាល័យ San Jose State បាននិយាយថា កោះ Maui បានស្ថិតក្នុងស្ថានភាពរាំងស្ងួតរួចហើយ ដែលធ្វើឲ្យកោះនេះមានហានិភ័យខ្ពស់នៃការមានអគ្គិភ័យនៅឆ្នាំនេះ ជាងរដ្ឋកាលីហ្វ័រញ៉ា។ លោក Clements បានប្រាប់ថា ចំណោតភ្នំដ៏ចោត ដែលអាចមើលឃើញក្រុង Lahaina ដែលរងគ្រោះខ្លាំងនោះ បានធ្វើឲ្យមានខ្យល់បក់កាន់តែខ្លាំង ដែលជំរុញឲ្យអណ្តាតភ្លើងឆាបឆេះសន្ធោរសន្ធៅឡើង ហើយរាលដាលចូលទៅតំបន់ដែលមានប្រជាជនរស់ក្នុងល្បឿនដ៏លឿន។

ចំណែកឯលោកស្រី Elizabeth Pickett នាយកសហប្រតិបត្តិនៃអង្គភាពគ្រប់គ្រងចំហេះព្រៃ នៅកោះហាវ៉ៃ បាននិយាយថា ការដុះកាន់តែច្រើននៃស្មៅមិនមែនធម្មជាតិដែលងាយឆេះខ្លាំង នៅលើកោះនេះ បានបន្ថែមដល់កម្រិតហានិភ័យ៕