រដ្ឋមន្ត្រីក្រសួងពាណិជ្ជកម្មស្តីទី បាននិយាយថា គណៈប្រតិភូតាលីបង់ បានពិភាក្សាអំពីការសម្របសម្រួលប្រតិបត្តិការហិរញ្ញវត្ថុអន្តរជាតិជាមួយធនាគារឯកជន ក្នុងការធ្វើដំណើរនាពេលថ្មីៗនេះ ទៅកាន់ប្រទេសកាហ្សាក់ស្ថាន ក្នុងកិច្ចប្រឹងប្រែង ដើម្បីបន្ធូរបន្ថយភាពឯកោនៃវិស័យធនាគារអាហ្វហ្គានីស្ថាន។

លោក ណូរូដឌីន អាហ្ស៊ីហ្ស៊ី ( Nooruddin Azizi) រដ្ឋមន្ត្រីក្រសួងពាណិជ្ជកម្ម និងឧស្សាហកម្មស្តីទី បានដឹកនាំគណៈប្រតិភូធុរកិច្ចទៅកាហ្សាក់ស្ថាន កាលពីសប្តាហ៍មុន។

លោកបានថ្លែងប្រាប់សារព័ត៌មានរ៉យទ័រក្នុងបទសម្ភាសន៍មួយកាលពីថ្ងៃពុធថា បន្ថែមពីលើវិស័យធនាគារ លោក បានពិភាក្សាអំពីលទ្ធភាពនៃពន្ធអនុគ្រោះពាណិជ្ជកម្ម គម្រោងទូរគមនាគមន៍ និងផ្លូវឆ្លងកាត់ រួមទាំងសម្រាប់ការដឹកជញ្ជូនប្រេងរបស់រុស្ស៊ីទៅកាន់អាស៊ីខាងត្បូងផងដែរ។ 

លោកបានបន្ថែមថា៖«យើងមានក្រុមមកពីធនាគារអាហ្វហ្គានីស្ថានដា (ធនាគារកណ្តាលរបស់អាហ្វហ្គានីស្ថាន)និងធនាគារឯកជននៅកាហ្សាក់ស្ថាន ពួកគេបានពិភាក្សា និងកំពុងព្យាយាមស្វែងរកវិធីល្អ ដើម្បីកាត់បន្ថយតម្លៃប្រតិបត្តិការហិរញ្ញវត្ថុ... យើងមិនមានការកំណត់ធនាគារណាមួយជាមួយកាហ្សាក់ស្ថានទេ"។

ក្រសួងពាណិជ្ជកម្មរបស់ប្រទេសកាហ្សាក់ស្ថាន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។