​

ទឹកជំនន់នៅតំបន់ភាគនិរតីប្រទេសបង់ក្លាដែស ដោយសារតែការហក់ឡើងនៃទឹកទន្លេ គួបផ្សំនឹងភ្លៀងធ្លាក់ខ្លាំង បានធ្វើឲ្យប៉ះពាល់ដល់មនុស្សជាង១ លាននាក់ និងមនុស្សរាប់ម៉ឺននាក់បានភៀសខ្លួនចេញ។ យោងតាមមជ្ឈមណ្ឌលសម្របសម្រួលការឆ្លើយតបគ្រោះមហន្តរាយជាតិ (NDRCC) របស់ប្រទេសស្ថិតក្រោមក្រសួងគ្រប់គ្រងគ្រោះមហន្តរាយ និងជំនួយ បានឲ្យដឹងថា មនុស្ស ៨៤៣,៥០៥ នាក់បានរងផលប៉ះពាល់ដោយទឹកជំនន់នៅក្នុងស្រុក Chattogram មានចម្ងាយប្រហែល ២៤០គីឡូម៉ែត្រពីរដ្ឋធានី Dhaka។

របាយការណ៍ ដែលបានចេញផ្សាយនៅលើគេហទំព័ររបស់ក្រសួងកាលពីយប់ថ្ងៃពុធបាននិយាយថា អាជ្ញាធរបានប្រញាប់ប្រញាល់បញ្ជូនក្រុមកងកម្លាំងឆ្លើយតបគ្រោះមហន្តរាយដើម្បីអនុវត្តប្រតិបត្តិការជួយសង្គ្រោះ បែងចែកជំនួយសង្គ្រោះបន្ទាន់។ ដោយដកស្រង់ប្រភពនៅក្នុងតំបន់ សារព័ត៌មានអង់គ្លេសឈានមុខមួយ Dhaka Tribune បាននិយាយកាលពីថ្ងៃព្រហស្បតិ៍ថា មនុស្សប្រហែល ៤៨០,០០ នាក់នៅតំបន់ Cox's Bazar បានរងផលប៉ះពាល់ដោយទឹកជំនន់ ចាកចេញពីលំនៅឋាន និងដើរឆ្លងកាត់ផ្លូវលិចទឹក ឬជិះនៅលើទូកដើម្បីស្វែងរកទីជម្រក ឬដីស្ងួតដើម្បីស្នាក់នៅបណ្តោះអាសន្ន។ ការរាយការណ៍តាមទូរទស្សន៍បានបង្ហាញឲ្យឃើញ ផ្ទៃដីធំទូលាយបានលិចទឹកនៅក្នុងតំបន់ភាគអាគ្នេយ៍ប្រទេសបង់ក្លាដែស ជាកន្លែងដែលទឹកជំនន់បានបង្កការខូចខាតយ៉ាងច្រើនដល់ទីជម្រក ដំណាំ ផ្លូវថ្នល់ និងផ្លូវហាយវេ។

ទាហានបង់ក្លាដែស ត្រូវបានដាក់ពង្រាយកាលពីថ្ងៃអង្គារទៅកាន់តំបន់ Chattogram ដើម្បីដោះស្រាយស្ថានភាពកាន់តែធ្ងន់ធ្ងរពេលភ្លៀងធ្លាក់ខ្លាំង។