ដោយកំពុងនៅក្នុងផ្ទះរបស់ខ្លួន នាភាគខាងជើងប្រទេសអាហ្វហ្គានីស្ថាន កញ្ញា Khushi វ័យ ១៩ឆ្នាំ បានគូររូបខ្លួនឯង ជារូបដែលឃ្លុំជិតទៅដោយស្បៃរុំមុខពណ៌ខៀវ ហើយជាប់នៅខាងក្នុងទ្រុង។

អតីតនិស្សិតសាកលវិទ្យាល័យរូបនេះ ធ្លាប់បានចូលរៀនផ្នែកច្បាប់ និងវិទ្យាសាស្ត្រនយោបាយ នៅឯសាកលវិទ្យាល័យដ៏ធំរបស់ខេត្ត Balkh ភាគខាងជើង។ ប៉ុន្តែនាងបានធ្លាក់ចូលទៅក្នុងស្ថានភាពអ្នកមានជំងឺធ្លាក់ទឹកចិត្ត ចាប់តាំងពីពួកតាលីបង់ បានបិទគ្រឹះស្ថានឧត្តមសិក្សាមិនឲ្យស្ត្រីចូលរៀន កាលខែធ្នូ ដោយតម្រូវឲ្យរូបនាងត្រូវព្យាបាលជំងឺផ្លូវចិត្ត ដែលនាងត្រូវបានណែនាំឲ្យមកព្យាបាលតាមរយៈសិល្បៈ។

នាង Khushi ដែលមិនត្រូវបានបង្ហាញឈ្មោះពេញ ដោយសារហេតុផលសុវត្ថិភាព បាននិយាយថា៖ «នៅពេលដែលខ្ញុំដឹងថា សុខភាពផ្លូវចិត្តរបស់ខ្ញុំមិនសូវល្អ ខ្ញុំក៏កើតទុក្ខ ខ្ញុំមិនសប្បាយចិត្តទាល់តែសោះ ខ្ញុំតែងតែធ្លាក់ទឹកចិត្ត ហើយខ្ញុំមានអារម្មណ៍ថា ដូចជាបក្សី កំពុងជាប់នៅក្នុងទ្រុង ពោលគឺជាមនុស្សម្នាក់ ដែលបាត់បង់អស់នូវសុភមង្គលគ្រប់យ៉ាង»។

នាងបានប្រាប់បន្ថែមថា៖ «បន្ទាប់ពីពួកតាលីបង់បានហាមឃាត់ក្មេងស្រីមិនឲ្យចូលរៀនសាកលវិទ្យាល័យ ហើយបានប្រកាសថា ក្មេងស្រីមិនអាចបន្តការសិក្សារបស់ខ្លួនបានទៀតទេ ខ្ញុំមានអារម្មណ៍តូចចិត្ត ពីមួយថ្ងៃទៅមួយថ្ងៃ សុខភាពផ្លូវចិត្តរបស់ខ្ញុំកាន់តែយ៉ាប់យ៉ឺនទៅៗ ហើយនៅទីបំផុត ខ្ញុំបានសម្រេចចិត្តទៅជួបគ្រូពេទ្យចិត្តសាស្ត្រ ដើម្បីព្យាបាលឲ្យប្រសើរឡើង»។

ពួកតាលីបង់ បានហាមឃាត់មិនឲ្យស្ដ្រីចូលរៀនសាកលវិទ្យាល័យ ក្នុងខែធ្នូ ឆ្នាំ២០២២ ដែលបង្កឲ្យមានការតវ៉ាជាសាធារណៈដ៏កម្រកើតឡើង។ ការសម្រេចនេះបានកើតឡើងបន្ទាប់ពីការបិទសាលាវិទ្យាល័យរបស់ក្មេងស្រីភាគច្រើន ហើយត្រូវបានបន្តធ្វើតាមដោយអាជ្ញាធរតាលីបង់ ដែលបញ្ជាឲ្យបុគ្គលិកមនុស្សធម៌ជាស្ត្រីអាហ្វហ្គានីស្ថានភាគច្រើន កុំទៅធ្វើការ។

យ៉ាងណាក្ដី ពួកតាលីបង់និយាយថា ពួកគេគោរពសិទ្ធិស្ត្រី ស្របតាមការបកស្រាយច្បាប់អ៊ីស្លាម និងវប្បធម៌របស់ប្រទេសអាហ្វហ្គានីស្ថាន៕