បាល់ទាត់៖ ក្រុមការពារតំណែងជើងឯកបឹងកេត នៅមិនទាន់ស្គាល់ជ័យជម្នះក្នុងការប្រកួតពានរង្វាន់មិត្តហ្វូនខេមបូឌានលីគ រដូវកាលឆ្នាំ២០២១ នេះឡើយ ក្រោយបន្ដបរាជ័យក្នុងជំនួបបង្គ្រប់សប្ដាហ៍ទី៣ ក្រោមថ្វីជើងក្រុមកំពូលតារាងអង្គរថាយហ្គឺរ ដោយលទ្ធផល ១-០ នៅកីឡដ្ឋាន RSU ខេត្តសៀមរាបកាលពីល្ងាចថ្ងៃទី២៣ ខែឧសភាម្សិលមិញ។
ជំនួបដ៏តានតឹងវគ្គទី១ ក្រុមទាំងពីរមិនមានការស៊ុតបញ្ចូលទីគ្នានោះទេ ខណៈលេងវគ្គទី២ បានជាង ១៥នាទី ខ្សែការពារបឹងកេត ទេស សម្បត្តិ បានបង្កកំហុសលើខ្សែប្រយុទ្ធវ័យក្មេង ឡុង ម៉េងហាវ នាំឲ្យអាជ្ញាកណ្ដាលសម្រេចផ្ដល់បាល់ពិន័យ ១១ម៉ែត្រឲ្យក្រុមម្ចាស់ផ្ទះ និងទាត់បញ្ចប់ទីបានសម្រេចដោយខ្សែប្រយុទ្ធប្រេស៊ីល Da Cruz នៅនាទី៦២។ បន្ទាប់ពីត្រូវក្រុមអង្គរថាយហ្គឺរបើកការនាំមុខ ១គ្រាប់មុន ក្រុមកំពុងស្រែកឃ្លានជ័យជម្នះនាគខៀវបឹងកេត បានព្យាយាមវាយបកកាន់តែខ្លាំង ព្រមទាំងការផ្លាស់ប្ដូរខ្សែប្រយុទ្ធ ចាន់ វឌ្ឍនាកា ចូលទៀតផង តែយ៉ាងណាក្រុមជើងឯក ៤សម័យនេះមិនអាចបំបែកទម្រង់លេងរបស់ក្រុមលោក Oriol Segura បានឡើយ ហើយលទ្ធផល ១-០ នេះក៏បានរក្សារហូតដល់ចប់ការប្រកួតតែម្ដង។
នេះគឺជាកំណត់ត្រាអាក្រក់មួយរបស់ក្រុមបឹងកេត ដែលរងបរាជ័យ ៣ប្រកួតផ្ទួនៗបែបនេះ បន្ទាប់ពី ២ប្រកួតដំបូង ក្រុមការពារតំណែងជើងឯកនេះបានបរាជ័យក្នុងទឹកដី ក្រោមថ្វីជើងក្រុមណាហ្គាវើលដ៏ ១-០ និងចាញ់ក្រុមភ្ញៀវភ្នំពេញក្រោន ២-១ កាលពីថ្មីៗកន្លងទៅ។ ចំណែកក្រុមអង្គរថាយហ្គឺរបានធ្វើឲ្យអ្នកគាំទ្រពួកគេពេញចិត្តជាខ្លាំង ចំពោះលទ្ធផលដ៏ល្អនាដើមរដូវកាល ដ្បិតជ័យជម្នះលើក្រុមខ្លាំងនេះ បានធ្វើឲ្យពួកគេបន្ដឈរកំពូលតារាង និងមាន ១៣ពិន្ទុ បន្ទាប់ពីឆ្លងកាត់ ៥ប្រកួតឈ្នះ ៤ និងស្មើ ១ មិនទាន់ស្គាល់ពាក្យចាញ់ឡើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
