ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) និងសមាគមឧកញ៉ាកម្ពុជា កាលពីរសៀលថ្ងៃទី១១ ខែសីហានេះ បានរៀបចំវេទិកាធុរកិច្ចឆ្នាំ២០២៣ ក្រោមអធិបតីភាព ឯកឧត្តម សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ដោយមានការចូលរួមពីថ្នាក់ដឹកនាំធុរកិច្ចជាង ៤០០នាក់នៅកម្ពុជា ព្រមទាំងអង្គទូត និងសមាគមពាណិជ្ជកម្មអន្តរជាតិនានា។

ឯកឧត្តម ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅក្នុងព្រឹត្តការណ៍នេះ បានមានប្រសាសន៍ថា វេទិកាធុរកិច្ចឆ្នាំ២០២៣ ដែលរៀបចំឡើងនៅពេលនេះ គឺជាវេទិកាមួយដ៏មានសារៈសំខាន់ ចាំបាច់ និងរៀបចំទាន់ពេលវេលា ដើម្បីបង្ហាញនូវការខិតខំប្រឹងប្រែងនៃការអនុវត្តនូវអនុស្សារណៈដែលបានចុះហត្ថលេខារវាងសមាគមឧកញ៉ាកម្ពុជា និងក្រុមប្រឹក្សាអភិវឌ្ឍន៍កម្ពុជា កាលពីខែឧសភាកន្លងទៅ ក្នុងភាពជាដៃគូសម្រាប់ការជំរុញធុរកិច្ច និងការវិនិយោគនៅកម្ពុជា។ ឯកឧត្តមបានបន្តថា សមាគមឧកញ៉ាកម្ពុជា និងក្រុមប្រឹក្សាអភិវឌ្ឍន៍កម្ពុជា នឹងបន្តផែនសកម្មភាពរបស់ខ្លូន ដើម្បីជំរុញការទាក់ទាញការវិនិយោគទាំងបរទេស និងក្នុងស្រុកបន្ថែម ដើម្បីរួមចំណែកអភិវឌ្ឍន៍សង្គម និងសេដ្ឋកិច្ចកម្ពុជា។

អ្នកឧកញ៉ា សៀ ឬទ្ធី អនុប្រធានសមាគមឧកញ៉ាកម្ពុជា និងជាប្រធានគណៈកម្មការទំនាក់ទំនងសាធារណៈនិងអន្តរជាតិ បានមានប្រសាសន៍ថា ការរៀបចំព្រឹត្តិការណ៍នេះ ដើម្បីឲ្យថ្នាក់ដឹកនាំវិស័យធុរកិច្ចជួបជុំគ្នា និងពិភាក្សាពីនិន្នាការថ្មីៗក្នុងសេដ្ឋកិច្ចកម្ពុជា។ អ្នកឧកញ៉ា បានបន្តថា ព្រឹត្តការណ៍នេះដែរ ក៏ជួយរឹតចំណងទំនាក់ទំនងរវាងថ្នាក់ដឹកនាំក្នុងវិស័យធុរកិច្ចនានាឲ្យកាន់តែស្អិតរមួត និងជំរុញការសហការគ្នាក្នុងវិស័យពាណិជ្ជកម្ម និងវិនិយោគផងដែរ។

ឯកឧត្តម សុខ ចិន្តាសោភា បានសម្តែងការអបអរសាទរដល់សមាគមឧកញ៉ាកម្ពុជា ដែលត្រូវបានសម្តេចតេជោ ហ៊ុន សែន នាយករដ្ឋមន្ត្រីផ្តល់ជូននៅបុព្វសិទ្ធក្នុងកិច្ចការវិនិយោគធ្វើជាដៃគូជាមួយរាជរដ្ឋាភិបាល ដោយមានលក្ខណៈបច្ចេកទេស ជាមួយក្រុមប្រឹក្សាអភិវឌ្ឍន៍កម្ពុជា ហើយនៅពេលមានដំណើរទស្សនកិច្ចទៅបរទេសក៏នឹងមានតំណាងរបស់សមាគមឧកញ៉ាកម្ពុជាត្រូវចូលរួមផងដែរ។

សូមបញ្ជាក់ថា ក្នុងវេទិកាធុរកិច្ចឆ្នាំ២០២៣នេះ ក៏មានរៀបចំជាការពិភាក្សាជាមួយវាគ្មិនអំពីប្រធានបទផ្សេងៗជាច្រើនផ្សេងៗគ្នា ដែលមានវាគ្មិនជំនាញៗដូចជា៖ ឯកឧត្តម ជា វុទ្ធី អគ្គលេខាធិការងក្រុមប្រឹក្សាអភិវឌ្ឍន៍កម្ពុជា ធ្វើការបង្ហាញពាក់ព័ន្ធបទប្បញ្ញត្តិ ច្បាប់ និងវិនិយោគ, អ្នកឧកញ៉ា សៀ ឬទ្ធី អនុប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន World Bridge Group បង្ហាញពាក់ព័ន្ធវិស័យភស្តុភារកម្ម និងដឹកជញ្ជូន, ឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា និងជាប្រធានក្រុមហ៊ុន Tropicam Group បង្ហាញពាក់ព័ន្ធកសិ-ផលិតកម្ម, ឧកញ៉ា គង់ សាង ប្រធានសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា បង្ហាញពាក់ព័ន្ធវិស័យវានភណ្ឌកាត់ដេរ ស្បែកជើង និងកាបូប, អ្នកឧកញ៉ា លាង ម៉េង អនុប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន Chip Mong Group បង្ហាញពាក់ព័ន្ធវិស័យអចលនទ្រព្យ និងបដិសណ្ឋារកិច្ច, ឧកញ៉ា វ៉ាន់ ឆារស៍ជួន អភិបាលក្រុមហ៊ុនកាណាឌីយ៉ាគ្រុប ប្រធានស្តីទីសមាគមអ្នកសាង់សង់កម្ពុជា បង្ហាញពាក់ព័ន្ធវិស័យសំណង់ និងធនាគារ, លោកស្រីឧកញ៉ា កែវ មុំ ស្ថាបនិកក្រុមហ៊ុននំស្រួយលីលី បង្ហាញពាក់ព័ន្ធកម្មន្តសាល និងសហគ្រាសធុនតូចនិងមធ្យម និងបណ្ឌិត ឆេង គីមឡុង សេដ្ឋកិច្ចវិទូផ្នែកសេដ្ឋកិច្ច នៃវិទ្យាស្ថានចក្ខុវិស័យអាស៊ី បង្ហាញពាក់ព័ន្ធសេដ្ឋកិច្ចកម្ពុជា និងនៅក្នុងតំបន់៕ ដោយ ៖ បូរ៉ាវី