យ៉េម៉ែន ៖ អង្គការសហប្រជាជាតិ បានប្រកាសកាលពីថ្ងៃសុក្រថា ការផ្ទេរប្រេងដែលមានហានីភ័យខ្ពស់ពីនាវាដឹកប្រេងដែលពុកផុយនៅឆ្នេរសមុទ្រប្រទេសយ៉េម៉ែនដែលហែកហួរដោយសង្រ្គាម បានបញ្ចប់ដោយសុវត្ថិភាព ដោយបានបញ្ចៀសនូវអ្វីដែលអាចជាមហន្តរាយបរិស្ថានបំផ្លិចបំផ្លាញ។ 

អ្នកនាំពាក្យរងរបស់អង្គការសហប្រជាជាតិលោក Farhan Haq បាននិយាយនៅក្នុងសេចក្តីថ្លែងការណ៍ថា ប្រតិបត្តិការពីនាវាទៅនាវាមានរយៈពេលពីរសប្តាហ៍ដើម្បីបូមប្រេងឆៅជាង១ លានបារ៉ែលពីនាវាដឹកប្រេង FSO Safer ដែលចាស់ពុកផុយ ទៅកាន់នាវាផ្ទុកប្រេងបណ្តោះអាសន្ន ត្រូវបានបញ្ចប់ដោយជោគជ័យកាលពីថ្ងៃសុក្រ។

សេចក្តីថ្លែងការណ៍បាននិយាយថា លោកអគ្គលេខាធិការ បានស្វាគមន៍ចំពោះព័ត៌មានដែលថាការផ្ទេរប្រេងពីនាវាទៅនាវា ពីនាវា FSO Safer ទៅកាន់នាវាជំនួសរបស់ប្រទេសយេម៉ែនត្រូវបានបញ្ចប់ដោយសុវត្ថិភាពនៅថ្ងៃនេះ ដោយបញ្ចៀសនូវអ្វីដែលអាចជាមហន្តរាយបរិស្ថាន និងមនុស្សធម៌ដ៏ធំធេង។ លោក Haq បាននិយាយថា ប្រមុខអង្គការសហប្រជាជាតិ បានថ្លែងអំណរគុណដល់អាជ្ញាធរយេម៉ែនសម្រាប់ការគាំទ្ររបស់ពួកគេ ហើយបានអរគុណចំពោះបណ្តាប្រទេស ក្រុមហ៊ុន និងបុគ្គលជាច្រើនដែលបានចូលរួមចំណែកក្នុងមូលនិធិដើម្បីបញ្ចៀសគ្រោះមហន្តរាយ។

ប៉ុន្តែលោកបានកត់សម្គាល់ថា ការផ្តល់មូលនិធិបន្ថែមគឺនៅតែត្រូវការដើម្បីរើចេញនាវា Safer ទទេ និងលុបបំបាត់ការគំរាមកំហែងដល់បរិស្ថានដែលនៅសេសសល់។ នាវា FSO Safer ដែលត្រូវយកចេញ ពីកំពង់ផែ Hodeidah តាំងពីឆ្នាំ ២០១៥ គឺជាគ្រាប់បែកកំណត់ពេលផ្ទុះដែលផ្ទុកប្រេងប្រហែល ១,១ លានបារ៉ែល។ ខណៈស្ថានភាពរបស់នាវាបន្តកាន់តែយ៉ាប់យ៉ឺន ក្តីបារម្ភបានកើនឡើងទាក់ទងនឹងសក្តានុពលនៃការលេចធ្លាយប្រេងដ៏មហន្តរាយ ដែលអង្គការសហប្រជាជាតិបានព្រមានថាអាចលើសពីគ្រោះមហន្តរាយ Exxon Valdez កាលពីឆ្នាំ ១៩៨៩ ។