បាល់ទាត់៖ ក្រុមភ្នំពេញក្រោនបានបន្ថែម ៣ពិន្ទុទៀតហើយ ក្រោយយកឈ្នះក្រុមភ្ញៀវខេត្តព្រៃវែងដោយលទ្ធផល ៤-១ ក្នុងជំនួបង្គ្រប់សប្ដាហ៍ទី៣ នៃពានរង្វាន់មិត្តហ្វូនខេមបូឌានលីគ នៅកីឡដ្ឋាន Smart RSN កាលពីចុងសប្ដាហ៍កន្លងទៅ ដែលនាំឲ្យអតីតក្រុមជើងឯក ៦សម័យនេះបន្ដកំណត់ត្រាឈ្នះ ៤ប្រកួតជាប់គ្នាមិនទាន់ស្គាល់ចាញ់ ឬស្មើឡើយ។
ជំនួបទទួលបានការចាប់អារម្មណ៍ខ្លាំង មិនចាញ់ក្រុមធំៗជួបគ្នានេះ វគ្គទី១ ក្រុមម្ចាស់ផ្ទះបានស៊ុតបំប៉ោងសំណាញ់ទីក្រុមក្មេងខ្ចីខេត្តព្រៃវែង ១គ្រាប់មុនដោយកីឡាករ Ose Takaki នៅនាទីទី១៤ មុនបន្ថែម ៣គ្រាប់ទៀតនៅវគ្គទី២ ដោយកីឡាករ Nieto ២គ្រាប់នៅនាទីទី៥៦ និងនាទីទី៦៥ និងកីឡាករ Yudai Ogawa នៅនាទីទី៩០។ ចំណែកខេត្តព្រៃវែងព្យាយាមវាយបកបានតែ ១គ្រាប់ប៉ុណ្ណោះដែលធ្វើសម្រេចោយកីឡាករ គី រីណា នៅនាទីទី៨៧។
នេះគឺជាជ័យជម្នះក្នុងទឹកដីលើកដំបូងរបស់ក្រុមសិង្ហក្រហម ក្នុងចំណោមជ័យជម្នះ ៤ប្រកួតជាប់ៗគ្នារបស់ពួកគេ ដែលនាំឲ្យភ្នំពេញក្រោនរកបាន ១២ពិន្ទុពេញ តាមពីក្រោយក្រុមកំពូលតារាងអង្គរថាយហ្គឺរ ១ពិន្ទុ។ រីឯខេត្តព្រៃវែងបានស្គាល់បរាជ័យលើកទី២ ក្នុងចំណោម ៤ប្រកួតឈ្នះ ១ ស្មើ ១ និងចាញ់ ២ប្រកួតសម្រាប់ការបង្ហាញខ្លួនលើកដំបូង ក្នុងពានរង្វាន់មិត្តហ្វូនខេមបូឌានលីគឆ្នាំ២០២១ នេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
