ក្រុមអាជ្ញាធរបាននិយាយថា យ៉ាងហោចណាស់មនុស្ស៦នាក់ បានស្លាប់ និងរាប់សិបនាក់ ត្រូវបានជួយសង្គ្រោះ បន្ទាប់ពីទូកជនអន្តោប្រវេសន៍ព្យាយាមឆ្លងកាត់ផ្លូវទឹកពីប្រទេសបារាំង បានលិច។ ហេតុការណ៍នេះបានកើតឡើងកាលពីព្រឹកថ្ងៃសៅរ៍ (១២ សីហា) ។
អភិបាលក្រុងក្នុងតំបន់បាននិយាយថា ប្រតិបត្តិការជួយសង្គ្រោះដ៏ធំត្រូវបានចាប់ផ្តើមនៅម៉ោងប្រហែល៦ព្រឹកម៉ោងក្នុងស្រុក ខណៈដែលទូកដឹកជនអន្តោប្រវេសន៍រាប់សិបគ្រឿង ព្យាយាមធ្វើដំណើរឆ្លងកាត់សមុទ្រក្នុងពេលតែមួយ។
ទីភ្នាក់ងារដែនសមុទ្របាននិយាយថា ជនអន្តោប្រវេសន៍ជិត៦០នាក់ត្រូវបានជួយសង្គ្រោះដោយទូកសង្គ្រោះរបស់បារាំង និងអង់គ្លេស ហើយបានបញ្ជូនទៅឆ្នេរសមុទ្របារាំង ឬអង់គ្លេស។ ប្រតិបត្តិការស្វែងរក និងជួយសង្គ្រោះ នៅតែបន្តនៅក្នុងផ្លូវទឹករវាងប្រទេសបារាំង និងអង់គ្លេស កាលពីរសៀលថ្ងៃសៅរ៍។
ផ្លូវទឹកនោះជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក ហើយមានចរន្តទឹកខ្លាំង ដែលធ្វើឲ្យការឆ្លងកាត់ដោយប្រើទូកតូចៗមានគ្រោះថ្នាក់យ៉ាងខ្លាំង។ ជនអន្តប្រវេសន៍ជាច្រើនទៀតត្រូវបានគេមើលឃើញថា បានចុះពីកប៉ាល់កងកម្លាំងព្រំដែនចក្រភពអង់គ្លេសនៅទីក្រុង Dover កាលពីព្រឹកថ្ងៃសៅរ៍។ ឆ្មាំល្បាតឆ្នេរអង់គ្លេសបាននិយាយថា មនុស្សទាំងអស់នៅលើទូកតូចមួយផ្សេងទៀតត្រូវបានជួយសង្គ្រោះនៅក្នុងឧប្បត្តិហេតុដាច់ដោយឡែកមួយកាលពីថ្ងៃសៅរ៍។
ជាធម្មតា ក្រុមជួញដូរមនុស្សតែងតែផ្ទុកមនុស្សលើសកំណត់ក្នុងទូកតូចៗ ដោយធ្វើឲ្យទូកទាំងនោះងាយនឹងលិច ហើយប្រឈមនឹងហានិភ័យនៃការត្រូវរលកបោកបក់ នៅពេលអ្នកដំណើរទាំងនោះព្យាយាមទៅកាន់ឆ្នេរសមុទ្រអង់គ្លេស។ តួលេខរបស់រដ្ឋាភិបាលចក្រភពអង់គ្លេសបង្ហាញថា ចំនួន នៃការឆ្លងកាត់ផ្លូវទឹករបស់ជនអន្តោប្រវេសន៍ចាប់តាំងពីដើមឆ្នាំ២០១៨មក បានលើសពីចំនួន១០០.០០០នាក់ក្នុងសប្តាហ៍នេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
