មនុស្សយ៉ាងហោចណាស់៤នាក់ បានស្លាប់ និងមនុស្ស៣នាក់ផ្សេងទៀត បានរងរបួស នៅ​ក្នុង​ហេតុការណ៍បំផ្ទុះលំនៅឋានមួយខ្នងកាលពីថ្ងៃសៅរ៍នៅតំបន់ជាយក្រុង Plum នៃទីក្រុង Pittsburgh។

ក្រុមអាជ្ញាធរបាននិយាយថា ការផ្ទុះនេះបានបំផ្លាញរចនាសម្ព័ន្ធចំនួន៣ទីតាំង និងបណ្ដាល​ឲ្យ​សំណង់​យ៉ាង​ហោចណាស់រាប់សិបកន្លែងផ្សេងទៀតខូចខាត ហើយមនុស្សម្នាក់​នៅ​តែ​បន្ត​បាត់​ខ្លួន។

នៅមុនម៉ោង១០:៣០នាទីព្រឹកបន្តិច (ម៉ោងក្នុងស្រុក) កាលពីថ្ងៃសៅរ៍ ទីភ្នាក់​ងារ​ព័ត៌មាន​បន្ទាន់​៩១១ បានទទួលការហៅទូរស័ព្ទថាផ្ទះជាច្រើនខ្នងបានឆេះ ដោយសារតែការផ្ទុះ។ ក្រុម​មន្រ្តី​ឆ្លើយ​តប និងអ្នកពន្លត់អគ្គិភ័យបានទៅដល់ទីតាំងកើតហេតុ ដើម្បី​ស្វែង​រក​មនុស្ស​ដែល​ជាប់​នៅ​ក្រោម​កម្ទេច​​កំទី នេះបើយោងតាមក្រុមមន្ត្រីតំបន់ Allegheny បានរាយការណ៍។

ក្រុមមន្ត្រីតំបន់ Allegheny បានរាយការណ៍នៅលើបណ្តាញសង្គមថា មនុស្ស​៤​នាក់​ត្រូវ​បាន​គេ​បញ្ជាក់​ថា​ ស្លាប់​ក្នុងឧបទ្ទវហេតុនោះ។ មនុស្ស៣នាក់ផ្សេងទៀតត្រូវបានគេបញ្ជូនទៅមន្ទីរពេទ្យ ដោយ​២​នាក់ស្ថិតក្នុងស្ថានភាពមានស្ថិរភាព និងមនុស្សម្នាក់ស្ថិតក្នុងស្ថានភាពធ្ងន់ធ្ងរ។

ក្រុមមន្ត្រីតំបន់បាននិយាយថា មនុស្សម្នាក់ទៀតនៅតែមិនទាន់ស្វែងរកឃើញនៅឡើយ។ ក្រុម​ពន្លត់​អគ្គិភ័យជាង ២០នាក់ត្រូវបានស្ថិតក្នុងការវាយតម្លៃសុខភាព ខណៈ​ដែល​ពួក​គេ​ភាគ​ច្រើន​ទទួល​រង​ការហត់នឿយដោយសារកម្ដៅនៅទីតាំងកើតហេតុនោះ៕