ក្រុមពន្លត់អគ្គិភ័យដែលចូលរួមប្រតិបត្តិការនៅកន្លែងកើតហេតុបាននិយាយថា មនុស្ស៤នាក់ រួមមានទារកអាយុ៧ខែម្នាក់ កុមារអាយុ៣ឆ្នាំម្នាក់ និងមនុស្សធំ២នាក់បានស្លាប់ បន្ទាប់​ពី​រថយន្ត​ក្រុង​ខ្នាត​តូច ដែលមានស្លាកលេខប៉ូឡូញ បានបើកធ្លាក់ពីលើស្ពាននៃផ្លូវហាយវេ ប្រទេសអូទ្រីស កាល​ពីថ្ងៃសៅរ៍ (១២ សីហា)។

ក្រុមពន្លត់អគ្គិភ័យនៅទីក្រុង Gaweinstal ត្រូវបាន​ជូន​ដំណឹង​ពី​ឧប្បត្តិហេតុ​នេះ​នៅម៉ោង​៧:១៥​នាទី​ព្រឹក (ម៉ោងក្នុងស្រុក) ហើយបាននិយាយថា រថយន្តនោះបានបើកឆ្លងកាត់ផ្លូវដែកនៃស្ពាន ហើ​យ​បានរអិលបន្ទាប់មកបានធ្លាក់ចូលទៅលើគន្លងផ្លូវ នៅក្រោមស្ពាននៃផ្លូវហាយវ៉េ។

ពួកគេបាននិយាយថា ក្មេងអាយុ៧ខែម្នាក់ ព្រមទាំងកុមារអាយុ៣ឆ្នាំម្នាក់ និង​ជីដូន​ជីតា​របស់​ពួក​គេ បានស្លាប់នៅក្នុងឧបទ្ទវហេតុនេះ ហើយអ្នកដំណើរផ្សេងទៀត រួមមានមនុស្សធំ២នាក់ និង​កុមារ​២​នាក់ កំពុងត្រូវបានព្យាបាលនៅក្នុងមន្ទីរពេទ្យក្នុងស្រុក។

គេមិនដឹងថាអ្នកដំណើរនៅក្នុងរថយន្តក្រុងនោះជាជនជាតិអ្វីខ្លះនោះទេ ប៉ុន្តែអនុ​រដ្ឋមន្ត្រី​ការ​បរទេស​ប៉ូឡូញ លោក Pawel Jablonski បានប្រាប់ទូរទស្សន៍ឯកជន Polsat ថា ពួក​គេ​ទំនង​ជា​ជន​ជាតិអ៊ុ​យក្រែន ដោយផ្អែកលើព័ត៌មានដែលប្រទេសប៉ូឡូញ បានទទួល​ពី​ក្រុម​អាជ្ញាធរ​អូទ្រីស​៕