មនុស្ស ៧នាក់បានស្លាប់ បន្ទាប់ពីវិហារអ៊ីស្លាមមួយដែលពោរពេញទៅដោយអ្នកថ្វាយបង្គំបានរលំ កាលពីថ្ងៃសុក្រ (១១ សីហា) នៅទីក្រុង Zaria ភាគខាងជើងនៃប្រទេសនីហ្សេរីយ៉ា ក្នុងរដ្ឋ Kaduna និងបណ្ដាលឲ្យមនុស្សជាច្រើននាក់ទៀតរងរបួស។

អ្នកនាំពាក្យក្រុមប្រឹក្សាទីក្រុង Zaria លោក Abdullahi Kwarbai បាននិយាយថា ឧបទ្ទវហេតុ​នេះ​បាន​កើតឡើង ខណៈដែលមនុស្សរាប់រយនាក់បានធ្វើការអធិស្ឋានពេលរសៀល នៅក្នុង​វិហារ​អ៊ីស្លាម​កណ្តាល​ទីក្រុងមួយ។

លោកបាននិយាយថា សាកសពមនុស្ស៤នាក់ត្រូវបានគេរកឃើញដំបូង ហើយបន្ទាប់​មក​សាក​សព​មនុស្ស ៣នាក់ផ្សេងទៀតត្រូវបានគេរកឃើញ បន្ទាប់ពីក្រុម​ជួយ​សង្គ្រោះ​បាន​ធ្វើ​ប្រតិបត្តិការ​ស្វែង​រក ក្នុងវិហារដែលបានដួលរលំនោះ។

ការដួលរលំអគារគឺកើតមានជាញឹកញាប់នៅក្នុងប្រទេសដែលមានប្រជាជនច្រើនបំផុតនៅទ្វីបអាហ្រ្វិក ដែលនិយ័តកម្មជាច្រើនត្រូវបានអនុវត្តយ៉ាងលំបាក ហើយ​សម្ភារៈ​សំណង់​ជា​ធម្មតា​មាន​គុណភាព​ទាប​ជាងស្តង់ដារ៕