ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ (១៣ សីហា) នេះថា ចំនួនអ្នក​ស្លាប់​ដោយ​សារ​​បំណាក់​ដីកាលពីសប្តាហ៍មុនក្នុងខេត្ត សានស៊ី (Shaanxi) ភាគពាយ័ព្យ​របស់​ប្រទេស​ចិន បានកើនឡើងដល់៤នាក់ហើយ ខណៈ​ប្រទេស​នេះ​ទទួល​រង​ភ្លៀង​ធ្លាក់​ខ្លាំង​ក្នុង​រដូវ​ក្តៅ​ខុស​ពី​ធម្មតា​។

រូបភាពពីយានដ្រូនរបស់ស្ថានីយ៍ទូរទស្សន៍រដ្ឋចិន (CCTV) បាន​បង្ហាញ​ពី​តំបន់​ដែល​រង​ផល​ប៉ះពាល់​ដោយ​ទឹកជំនន់ និងបំណាក់ដី ដែលពោរពេញដោយកំទេចកំទី ក៏ដូចជា​រថយន្ត​ដែល​ជាប់​គាំង​នៅ​ក្នុង​ផ្លូវទឹកផងដែរ។

ទូរទស្សន៍ CCTV បាននិយាយថា ហេដ្ឋារចនាសម្ព័ន្ធដូចជាផ្លូវថ្នល់ ស្ពាន និងកន្លែងផ្គត់​ផ្គង់​ថាមពល ត្រូវបានខូចខាត ខណៈដែលក្រុមស្វែងរក និងជួយសង្គ្រោះ ព្រម​ទាំង​បុគ្គលិក​ពង្រឹង​សុវត្ថិភាព​ច្រាំង​ទន្លេ ត្រូវបានបញ្ជូនទៅកាន់តំបន់រងផលប៉ះពាល់ទាំងនោះ។

ការស្លាប់ និងរបួសបានកើតមានឡើង បន្ទាប់ពីមានភ្លៀងធ្លាក់ខ្លាំង និងទឹកជំនន់ បានបំផ្លិច​បំផ្លាញ​ផ្នែក​ជាច្រើននៃប្រទេសចិន ជាមួយនឹងអាកាសធាតុដ៏ធ្ងន់ធ្ងរ បន្ទាប់ពីព្យុះទីហ្វុង Doksuri ដែល​បានបោកបក់ដល់ដីនៅខេត្តហ្វ៊ូជាន ភាគខាងត្បូង រយៈពេលជិតបីសប្តាហ៍មុនមក៕