ក្រសួងអប់រំ យុវជន និងកីឡា សហការជាមួយសាលាភូមិន្ទរដ្ឋបាល នៃក្រសួងមុខងារសាធារណៈ នៅ​រសៀល​ថ្ងៃទី១៣សីហានេះ បានរៀបចំការប្រឡងជ្រើសរើសមន្រ្តីរដ្ឋបាលទូទៅ សម្រាប់​បម្រើ​ការងារ​នៅ​តាមអង្គភាព និងគ្រឹះស្ថានសិក្សានានាក្រោមឱវាទទីស្តីការក្រសួងអប់រំ ចំនួន ១០០​កន្លែង​ ស្ថិតក្នុងក្របខណ្ឌប្រភេទ (ក)។

ការប្រឡងនេះ ធ្វើឡើងនៅសាលាភូមិន្ទរដ្ឋបាល ដោយមានការអញ្ជើញចូលរួម បើក​វិញ្ញាសា​ប្រឡង ដោយឯកឧត្តម យក់ ប៊ុនណា រដ្ឋលេខាធិការប្រចាំការ និង​ជា​នាយក​រដ្ឋ​សាលា​ភូមិន្ទ​រដ្ឋបាល នៃក្រសួងមុខងារសារធារណៈ តំណាងឯកឧត្តមរដ្ឋមន្រ្តី ព្រុំ សុខា និង​ឯកឧត្ដម​បណ្ឌិត​សភា​ចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា តំណាង​ឯកឧត្តម​រដ្ឋ​មន្រ្តី​ក្រសួង​អប់រំ។

នៅក្នុងឱកាសនោះ ឯកឧត្តមយក់ ប៊ុនណា មានប្រសាសន៍ថា ការប្រលងជ្រើសរើសនេះ ប្រព្រឹត្តិ​ទៅ​ចំនួន​ ២លើក ដោយលើកទី១ នៅថ្ងៃទី១៣ ខែសីហានេះ ចាប់ពីម៉ោង២រសៀល រហូត​ដល់​ម៉ោង​៣៖៣០នាទី។ បេក្ខជនត្រូវឆ្លើយសំនួរពហុចម្លើយពាក់ព័ន្ធនឹងចំណេះដឹងទូទៅ និង​រដ្ឋបាល​(មេគុណ១) ​និង​ជំនាញ(មេគុណ២) ដែលវិញ្ញាសាជំនាញសរុប ៨វិញ្ញាសា។ ហើយ​ការ​ប្រឡង​លើកទី១ មាន​បេក្ខជនសរុប ៦៩០នាក់ ដែលបានដាក់ពាក្យប្រឡង ក្នុងនោះស្រ្តី ២៨៦នាក់ ស្មើរ​នឹង​១៨​បន្ទ​ប់ប្រឡង ដោយជ្រើសរើសចំនួន ២០០នាក់ លើតម្រូវ​ការ ១០០នាក់ សម្រាប់​បន្ត​ចូល​រួម​ប្រឡង​ លើកទី២ ដែលនឹងប្រព្រឹត្តិទៅ នៅថ្ងៃទី១៨ ខែសីហា ឆ្នាំ២០២៣។

ដើម្បី​ធានាការអនុវត្តគោលការណ៍ប្រឡងឱ្យមានប្រសិទ្ធភាព ក្រសួងអប់រំយុវជន និងកីឡា និង​សាលា​ភូមិន្ទ​រដ្ឋបាល បានសហការរៀបចំ គណៈកម្មការប្រឡងចំនួន១៨ រួមមាន៖ គណៈកម្មការ​ទទួល​ខុស​ត្រូវ​រួម, អប្បមាទ, ចេញវិញ្ញាសា, សំណេរ, មណ្ឌលកំណែ, ធ្វើ​អត្រា​កំណែ,​ ស្រង់​បូក​ពិន្ទុ ផ្ទៀងផ្ទាត់ និងប្រកាសលទ្ធផលជាដើម។ ក្រៅពីនេះ ក៏មាន​ការៀបចំបទប្បញ្ញត្តិផ្សេងៗ ទាក់​ទង​នឹង​ការប្រឡងផងដែរ។

គួរបញ្ជាក់ដែរថា បេក្ខជនដែលប្រលងជាប់ នឹង​ទទួល​បាន​ការ​បណ្តុះ​បណ្តាល​នៅ​សាលា​ភូមិន្ទ​រដ្ឋបាល មុនចេញទៅបម្រើការងារនៅតាមអង្គភាព និងគ្រឹះស្ថានសិក្សានានា ក្រោម​ឱវាទ​ទីស្តី​ការ​ក្រសួង​អប់រំ យុវជន និងកីឡា៕ អត្ថបទ៖ ទូច សោភ័ណ