ឯកឧត្តម ហេង សួរ តំណាងឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានចាត់​ទុក​ជ័យលាភី​អាហារូបករណ៍ជប៉ុន (JDS)ទាំងអស់ គឺជាធនធាន​ដ៏​មាន​សក្តានុពល​ សម្រាប់​ការ​អភិវឌ្ឍ​សេដ្ឋកិច្ច និងសង្គម។

ក្នុងកម្មវិធីជួបជុំសំណេះសំណាលជាមួយនិស្សិតដែលនឹងទៅបន្តការសិក្សានៅប្រទេសជប៉ុន សម្រាប់​ឆ្នាំ​សិក្សា២០២៣-២០២៥ ចំនួន២៦រូប កាលពីល្ងាចថ្ងៃទី១៣ សីហា ឆ្នាំ២០២៣​កន្លង​ទៅ​ ឯកឧត្តម ហេង សួរ បានមានប្រសាសន៍ថា អាហារូបករណ៍​ដែល​និស្សិត​ទទួល​បាន​នា​ពេល​នេះ គឺកើត​ចេញ​ពី​ចំណងមិត្តភាពដ៏ល្អរឹងមាំរវាងកម្ពុជា និងជប៉ុន និងកត្តាសន្តិភាព ដែល​ជា​មរតក​មិន​អាចកាត់ថ្លៃបានរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជា​បុរេ​លក្ខ​ខណ្ឌ។

ឯកឧត្តម ហេង សួរ បាន​ក្រើន​រំលឹក​ដល់​និស្សិត​ទាំង​អស់​ត្រូវ​ធ្វើ​ជា​ទូត​សុឆន្ទៈ​រប​ស់​កម្ពុជា​ក្នុង​ការ​បង្ហាញ​ពី​វប្បធម៌ ទំនៀមទំលាប់ ប្រពៃណីដ៏ផូរផង់របស់កម្ពុជាទៅកាន់និស្សិត និងប្រជាជនជប៉ុន ក៏​ដូចជាប្រជាជាតិដទៃទៀតដែលនិស្សិតបានជួបប្រាស្រ័យទាក់ទង ក្នុងអំឡុង​ពេល​សិក្សា​នៅ​ក្នុង​ប្រទេស​ជប៉ុន។ ឯកឧត្តម ក៏បានបង្ហាញនូវក្តីសង្ឃឹមយ៉ាងមុតមាំថា និស្សិតជ័យលាភីទាំងអស់ នឹង​ទទួលបានជោគជ័យក្នុងដំណើរសិក្សានេះ ដើម្បីពាំនាំយកនូវចំណេះដឹង ចំណេះធ្វើ និង​បទ​ពិសោធន៍ វិលត្រឡប់មកបម្រើការងារនៅកម្ពុជាវិញ និងរួមចំណែកក្នុងការអភិវឌ្ឍសង្គម និង​សេដ្ឋកិច្ច​កម្ពុជា ជាពិសេសចក្ខុវិស័យក្នុងការប្រែក្លាយកម្ពុជា ជាប្រទេស​ដែល​មាន​ចំណូល​មធ្យម​កម្រិត​ខ្ពស់​ក្នុងឆ្នាំ២០៣០ និងជាប្រទេសដែលមានចំណូលខ្ពស់ក្នុងឆ្នាំ២០៥០។

គិត​ចាប់ពីឆ្នាំ១៩៩៣ រហូតមកដល់បច្ចុប្បន្នមាននិស្សិតកម្ពុជាចំនួនជាង ១ ៤៨០នាក់ហើយ ដែល​បានទៅសិក្សានៅប្រទេសជប៉ុន។ ដោយឡែក ចំពោះ​អាហារូបករណ៍​អភិវឌ្ឍន៍​ធន​ធាន​មនុស្ស​របស់​ជប៉ុន (Human Resource Development Scholarship by Japanese Grant Ad/JDS) ត្រូវបានបង្កើតឡើងនៅកម្ពុជាក្នុងឆ្នាំ២០០០ ក្រោម​ជំនួយ​ឥត​សំណង​របស់​រដ្ឋាភិបាល​ជប៉ុន។ អាហារូបករណ៍ JDS ផ្តោត​សំខាន់​លើ​មន្ត្រី​រាជការ​វ័យ​ក្មេង​ដែល​មាន​សមត្ថភាព​ ដើម្បី​ចូល​រួម​ក្នុង​ការ​អនុវត្តផែនការអភិវឌ្ឍន៍សង្គម និងសេដ្ឋកិច្ច ក្នុងនាមជាអ្នកដឹកនាំនាពេលអនាគត។ គិតមកទល់បច្ចុប្បន្ន កម្ពុជាបានបញ្ជូននិស្សិតសរុបចំនួន ៥៤៨នាក់ បាន​ទៅ​សិក្សា​នៅ​ប្រទេស​ជប៉ុន ក្រោមគម្រោងអាហារូបករណ៍JDS។ ក្នុងឆ្នាំ២០២៣ នេះ មន្រ្តីរាជការកម្ពុជា សរុបចំនួន ២៦​រូប (ស្រី១២រូប) ដែលមកពីក្រសួង ស្ថាប័នរដ្ឋ និងគ្រឹះស្ថានសាធារណៈចំនួន១៧ បាន​ទទួល​អាហារូបករណ៍ JDS ក្នុងនោះចំនួន ២រូប សិក្សាថ្នាក់បណ្ឌិត និង ២៤រូប សិក្សា​ថ្នាក់​អនុបណ្ឌិត​៕