ភ្នំពេញ៖ អង្គការសម្ព័ន្ធមិត្តសត្វព្រៃ (WA) សូមស្វាគមន៍ និងគាំទ្រចំពោះអនុក្រឹត្យលេខ ១៧៣ អនក្រ.បក “ស្ដីពីការបង្កើតឧទ្យានជាតិជួរភ្នំក្រវាញ” របស់រាជរដ្ឋាភិបាល ដែលជាការច្របាច់ បញ្ចូលគ្នា នៃឧទ្យានជាតិជួរភ្នំក្រវាញកណ្ដាល ឧទ្យានជាតិជួរភ្នំក្រវាញខាងត្បូង និងរបៀង អភិរក្សជីវៈចម្រុះ ប្រព័ន្ធតំបន់ការពារធម្មជាតិ ។ 

បណ្ឌិត ស៊ូវណ្ណា ហ្គោនឡែត នាយិការអង្គការសម្ព័ន្ធមិត្តសត្វព្រៃ បានលើកឡើងថា ការ ច្របាច់បញ្ចូលគ្នានេះ គឺជាក្តីសុបិនរបស់អ្នកអភិរក្សទាំងអស់ ដែលធ្វើការនៅតំបន់ជួរភ្នំក្រវាញ ដែលចង់ឃើញនូវតំបន់ទេសភាពមួយ មានលក្ខណៈរួបរួមគ្នាតែមួយ ដើម្បីរក្សាទុកសម្រាប់ អភិរក្សតំបន់ទីជម្រាលប្រភពទឹក ដ៏មានសារៈសំខាន់ ស្ថិតនៅភាគនិរតី នៃប្រទេសកម្ពុជា និង ក៏ជាការឆ្លើយតបផងដែរ ទៅនឹងបទចោទ ដែលថាព្រំប្រទល់នៅពុំមានភាពច្បាស់លាស់ រវាង ដីស្រែចម្ការរបស់ប្រជាពលរដ្ឋ និងព្រំប្រទល់គម្រោងរេដបូក ដោយអង្គការ WA សូមធ្វើការបំភ្លឺ ថា នេះមិនមែនជាការពិតនោះទេ ។ 

នាយិការ WA បានបន្តថា អង្គការសម្ព័ន្ធមិត្តសត្វព្រៃ បាននិងកំពុងធ្វើការយ៉ាងជិតស្និត ជាមួយសហគមន៍ជនជាតិដើមភាគតិចជង ដែលរស់នៅក្នុងតំបន់ជ្រលងភ្នំឆាយអារ៉ែង ដោយ បានជួយកំណត់ព្រំប្រទល់ដីស្រែចម្ការ និងដីសម្រាប់សហគមន៍មូលដ្ឋាន ប្រើប្រាស់ចាប់តាំង ពីឆ្នាំ ២០១៥មកម្ល៉េះ គឺបន្ទាប់ពីគម្រោងទំនប់វារីអគ្គិសនីត្រូវបានផ្អាក WA គឺជាស្ថាប័នទីមួយ ដែលបានឈានជើង ចូលទៅជួយសហគមន៍ជនជាតិដើមភាគតិចជង ។ 

បណ្ឌិត ស៊ូវណ្ណា ហ្គោនឡែត បន្ថែមថា ការវាយតម្លៃជីវភាពប្រជាពលរដ្ឋ លើកដំបូងត្រូវបានធ្វើនៅក្នុងឆ្នាំ២០១៥ បន្ដដោយការធ្វើ ផែនការប្រើប្រាស់ដីធ្លី ដោយមានការចូលរួម ដែល ត្រូវបានអនុវត្តនៅក្នុងភូមិទាំង៦ នៃតំបន់ជ្រលងភ្នំឆាយអារ៉ែងនេះ ដោយសារតែភូមិទាំង៦ នេះ មិនត្រូវបានវាស់វែងដោយបទបញ្ជា ០១បប នោះទេ ។ ជាលទ្ធផល ផ្ទៃដីស្រែចម្ការទំហំ១,៧៩៩ហិកតា ត្រូវបានកំណត់អត្ដសញ្ញាណ និងកំណត់ជាផែនទីដីប្រើប្រាស់របស់ពលរដ្ឋចំនួន ៣៤២គ្រួសារ នៅក្នុងឃុំប្រឡាយ និងឃុំជំនាប់ ។ តាមការកំណត់អត្តសញ្ញាណដីប្រើប្រាស់ ខាងលើ ប្រជាពលរដ្ឋមានដីលំនៅដ្ឋាន និងដីស្រែចម្ការជាមធ្យមទំហំ ៥.៦ហិកតា ក្នុងមួយ គ្រួសារ ។

នាយិការអង្គការ WA រូបនេះ បានបញ្ជាក់ថា លើសពីនេះទៅទៀត ការប្រមូលអនុផល ព្រៃឈើក៏ត្រូវបានអនុញ្ញាតនៅក្នុងតំបន់គម្រោងរេដបូកផងដែរ ។ ការប្រមូលអនុផលព្រៃឈើ នេះត្រូវបានអនុញ្ញាតដោយច្បាប់ស្ដីពីតំបន់ការពារធម្មជាតិ ឆ្នាំ២០០៨ ។ តែទោះជាយ៉ាងណា ក៏ដោយ ការកាប់ឈើ និងការកាប់រានដីព្រៃស្ថិតនៅក្រៅតំបន់សហគមន៍តម្រូវឱ្យមានការ អនុញ្ញាតពីក្រសួងបរិស្ថានជាមុនសិន ៕ អត្ថបទ បាន សុខរិទ្ធិ