ភ្នំពេញ ៖ ផ្នែកគ្រប់គ្រងសុខភាពបរិស្ថាន និងគ្រោះមហន្តរាយ មនី្ទរសុខាភិបាល នៃរដ្ឋបាលរាជធានីភ្នំពេញ បានបន្តចុះអប់រំផ្សព្វផ្សាយស្តីពី៖ សុវតិ្ថភាពចំណីអាហារ និងសុខភាពមាត់-ធ្មេញ ជូនដល់សិស្សានុសិស្ស ចាប់ពីថ្នាក់មត្តេយ្យ ថ្នាក់ទី១ រហូតដល់ទី៦ ចំនួនសរុបជាង១ពាន់នាក់ នៃសាលាបឋមសិក្សាអនុវត្តរាជធានី នាព្រឹកថ្ងៃ១៤ ខែសីហា ឆ្នាំ២០២៣នេះ។ 

​ទន្តបណ្ឌិត ងី ទិត ប្រធានផ្នែកគ្រប់គ្រងសុខភាពបរិស្ថាន និងគ្រោះមហន្តរាយ រួមនិងអ្នកគ្រូពេទ្យ ហោ លីណែត មន្រ្តីផ្នែកសុខភាពបរិស្ថាន និងគ្រោះមហន្តរាយ នៃមនី្ទរសុខាភិបាល រដ្ឋបាលរាជធានីភ្នំពេញ បាននិយាយថា ការប្រើប្រាស់ និងបរិភោគចំណីអាហារដែលមិនល្អ និងចូលចិត្តញ៉ាំចំណីអាហារដែលមានរស់ជាតិផ្អែមខ្លាំង និងភេសជ្ជៈផ្អែម គឺធ្វើឲ្យប៉ះពាល់ដល់សុខភាពទូទៅ ដូចជា ធ្វើឲ្យឡើងគីឡូ កើតជំងឺពុកធ្មេញ។ ដូច្នេះការថែទាំសុខភាពមាត់ធ្មេញ បានត្រឹមត្រូវ សុខភាពទូទៅល្អប្រពៃ។

ទន្តបណ្ឌិត ងី ទិត បានបន្តថា ការចាប់ផ្តើមកម្មវិធីចុះអប់រំផ្សព្វផ្សាយនេះ ធ្វើឡើងកាលពីខែកុម្ភះ ឆ្នាំ២០២៣ រហូតមកដល់ពេលនេះ បានចំនួនជាង២០សាលាបឋមសិក្សាហើយ។ ដោយក្នុង១ខែៗ ក្រុមការងារគ្រូពេទ្យជំនាញ បានចុះធ្វើសកម្មភាពអប់រំ ចំនួន៤លើក តាមបណ្តាសាលាបឋមសិក្សានានា ក្នុងរាជធានីភ្នំពេញ ដើម្បីចូលរួមពង្រឹងការអនុវត្ត និងសំដៅលើកកម្ពស់ សុខុមាលភាព សុវតិ្ថភាព និងអនាម័យនៅតាមគ្រឹះស្ថានសិក្សា ចំណេះទូទៅសាធារណៈ ក្នុងរាជធានីភ្នំពេញផងដែរ។

ជាមួយគ្នានោះដែរសិស្សានុសិស្ស បានចូលរួមក្នុងកម្មវិធីអប់រំផ្សព្វផ្សាយស្តីពី៖ សុវតិ្ថភាពចំណីអាហារ និងសុខភាពមាត់-ធ្មេញ បានលើកឡើងរួមគ្នាថា ក្នុងនាមសិស្ស ពិតជាសប្បាយរីករាយ ដែលមានក្រុមគ្រូពេទ្យជំនាញ ចុះមកពន្យល់ណែនាំអំពីវិធីសាស្រ្ត ក្នុងការថែទាំសុខភាពមាត់ ធ្មេញ និងការដុសធ្មេញជារៀងរាល់ថ្ងៃ ពិតជាសំខាន់ណាស់ ធ្វើឲ្យពួកយើងទំពារអាហារបានម៉ត់ល្អ ក្លិនមាត់ល្អ ជួយលើកសោភណ្ឌភាពផ្ទៃមុខ និយាយបានច្បាស់ល្អ និងធ្វើឲ្យការសិក្សារបស់យើងបានប្រសើរ។

ជាចុងក្រោយអ្នកគ្រូ នូរ ស៊ីវណ្ណថា នាយិការង សាលាបឋមសិក្សាអនុវត្តរាជធានី បានបញ្ជាក់ថា សកម្មភាពរបស់លោកគ្រូពេទ្យ អ្នកគ្រូពេទ្យ បានចុះមកផ្ទាល់ដល់សាលានាថ្ងៃនេះ ជាជំនួយស្មារតីបន្ថែម ជូនដល់សិស្សក្នុងការសិក្សាស្វែងយល់ពីរបៀបថែទាំសុខភាពមាត់-ធ្មេញ កាលណាដុសធ្មេញបានស្អាតល្អ និងបរិភោគចំណីអាហារល្អ ក៏ជាជំនួយដល់ក្រពះពោះវៀនផងដែរ។ ជាប្រចាំថ្ងៃ ក្នុងពេលគោរពទង់ជាតិ គណៈគ្រប់គ្រង ក៏ដូចជាលោកគ្រូ អ្នកគ្រូ បានធ្វើការផ្សព្វផ្សាយអំពីសុវតិ្ថភាពចំណីអាហារ ឲ្យសិស្សហូបអាហារណាដែលល្អៗមិនធ្វើឲ្យប៉ះពាល់ដល់សុខភាព គ្រឿងកំប៉ុង ឬភេសជ្ជៈផ្អែម ហាមដាច់ខាតមិនឲ្យលក់ក្នុងសាលា ឲ្យសិស្សហូបតែទឹកស្អាត ដោយមានធុងចំរោះទឹកស្អាត ដាក់ជូនសិស្ស សម្រាប់ហូបផងដែរ៕ ដោយ ៖ រដ្ឋា