កូរ៉េខាងត្បូង និងសហរដ្ឋអាមេរិក បានប្រកាស នៅថ្ងៃចន្ទ (ទី១៤ ខែសីហា)នេះ ថា ប្រទេសទាំង២ នឹងធ្វើសមយុទ្ធរដូវក្តៅឈ្មោះ Ulchi Freedom Guardian នៅថ្ងៃទី ២១-៣១ ខែសីហា ដើម្បីបង្កើនសមត្ថភាពរបស់សម្ព័ន្ធមិត្ត ក្នុងការឆ្លើយតបទៅនឹងការវិវឌ្ឍនៃការគំរាមកំហែងអាវុធនុយក្លេអ៊ែរ និងមីស៊ីលរបស់ប្រទេសកូរ៉េខាងជើង។

យោងតាមសេចក្តីប្រកាសព័ត៌មានរបស់អគ្គសេនាធិការចម្រុះកូរ៉េខាងត្បូង (JCS) បានឲ្យដឹងថា សមយុទ្ធ នៅឆ្នាំនេះ នឹងធ្វើឡើងក្នុងទ្រង់ទ្រាយធំបំផុត ដែលមិនធ្លាប់មាន ដោយរួមកងទ័ពរាប់ម៉ឺននាក់ពីភាគីទាំង២ និងពីរដ្ឋជាសមាជិកមួយចំនួននៃទីបញ្ជាការអង្គការសហប្រជាជាតិ សម្រាប់កម្មវិធីហ្វឹកហ្វឺនប្រមាណ ៣០កន្លែង។

កូរ៉េខាងជើង បានប្រកាសថ្កោលទោសសមយុទ្ធយោធារបស់សម្ព័ន្ធមិត្តនេះថា ជាការហាត់សម ដើម្បីធ្វើសង្គ្រាមនុយក្លេអ៊ែរ។ ការប្រកាសនេះ បានកើតមានឡើង នៅពេលដែលមេដឹកនាំកូរ៉េខាងជើងលោក គីម ជុងអ៊ុន (Kim Jong Un) បានទៅទស្សនារោងចក្រយោធាធំៗ កាលពីថ្ងៃសុក្រ (ទី១១ ខែសីហា) និងថ្ងៃសៅរ៍ (ទី១២ ខែសីហា) ហើយលោកបានអំពាវនាវឲ្យផលិតមីស៊ីលឲ្យបានច្រើនបន្ថែមទៀត ដើម្បីជួយធានាដល់ «អំណាចយោធាដ៏មហិមា» និងត្រៀមខ្លួនជាស្រេចសម្រាប់សង្គ្រាម៕