យោងតាមអ្នកជំនាញបន្ទះឈីប ក្នុងស្រុក និងអ្នកវិទ្យាសាស្ត្រនយោបាយ នៅក្នុងបទសម្ភាសជាមួយបណ្ដាញទូរទស្សន៍ China Global Television (CGTN) បានឲ្យដឹងថា បម្រាមលើការវិនិយោគផ្នែកបច្ចេកវិទ្យាលើប្រទេសចិនរបស់សហរដ្ឋអាមេរិក បានរារាំងផលប្រយោជន៍រួមរបស់ក្រុមហ៊ុនផលិតបន្ទះអេឡិចត្រូនិករបស់ពិភពលោក ក៏ដូចជាគំរូនៃការអភិវឌ្ឍជាសកលរបស់វិស័យនេះ ដែលបានចំណាយពេលជាច្រើនទសវត្សរ៍ ដើម្បីបង្កើតឡើង។

ប្រធានាធិបតីសហរដ្ឋអាមេរិកលោក Joe Biden កាលពីថ្ងៃពុធ បានចុះហត្ថលេខាលើក្រឹត្យ ដែលនឹងហាមឃាត់ការវិនិយោគថ្មីរបស់សហរដ្ឋអាមេរិក នៅប្រទេសចិន សម្រាប់បច្ចេកវិទ្យានានា ដែលពោរពេញដោយការប្រកួតប្រជែង ដូចជាបន្ទះឈីបកុំព្យូទ័រជាដើម។

ក្រឹត្យនេះ អនុញ្ញាតឲ្យរដ្ឋមន្ត្រីក្រសួងរតនាគារសហរដ្ឋអាមេរិក ហាមឃាត់ ឬដាក់កម្រិតលើការវិនិយោគរបស់សហរដ្ឋអាមេរិក ក្នុងស្ថាប័នរបស់ចិន លើវិស័យចំនួន៣ គឺបន្ទះអេឡិចត្រូនិក និងមីក្រូអេឡិចត្រូនិក បច្ចេកវិទ្យាព័ត៌មាន Quantum និងប្រព័ន្ធបញ្ញាសិប្បនិម្មិតមួយចំនួន។

បន្ទាប់ពីមានការដាក់បម្រាមនេះ ក្រសួងការបរទេសចិន បានសម្តែងការប្រឆាំងយ៉ាងខ្លាំងក្លា ចំពោះការសម្រេចនេះ ដោយចាត់ទុកវិធានការនេះថា ជាការបង្ខិតបង្ខំផ្នែកសេដ្ឋកិច្ច និងការសម្លុតកំហែងផ្នែកបច្ចេកវិទ្យា។ ហើយអ្នកជំនាញលើកឡើងថា ការរឹតបន្តឹងជាបន្តបន្ទាប់របស់សហរដ្ឋអាមេរិកលើឧស្សាហកម្មបន្ទះអេឡិកត្រូនិករបស់ប្រទេសចិននេះ ពោលគឺការបង្កើតច្បាប់ស្តីពីការផលិតឈីបនិងវិទ្យាស្ត្រ( Chips and Science Act) ដែលចូលជាធរមានកាលពីខែសីហាឆ្នាំមុន កំពុងរំខានដល់ខ្សែចង្វាក់ផ្គត់ផ្គង់ពិភពលោក។

ក៏មានការព្រមានផងដែរថា សកម្មភាពរបស់សហរដ្ឋអាមេរិក កំពុងនាំឲ្យមានការកើនឡើងនូវការខាតបង់ដល់ក្រុមហ៊ុនសកលលោក ដែលនៅទីបំផុតនឹងទាញក្រុមហ៊ុនក្នុងស្រុកដ៏ច្រើនរបស់ខ្លួនធ្លាក់ចូលទៅក្នុងវដ្ដចក្រដ៏អាក្រក់មួយ។

ជាមួយគ្នានេះ អ្នកជំនាញក៏និយាយដែរថា ការសម្រេច ដើម្បីរំខានដោយបង្ខំដល់ថាមពលនៃឧស្សាហកម្មធម្មជាតិ ដើម្បីខ្ទាស់ដល់ឧស្សាហកម្មបន្ទះអេឡិកត្រូនិករបស់ចិន ដែលជាប្រទេសមានសេដ្ឋកិច្ចធំទី២ របស់ពិភពលោក និងជាផ្នែកដ៏សំខាន់បំផុតនៃផលិតកម្មពិភពលោក អាចត្រឡប់ជាធ្វើឲ្យវិស័យផលិតកម្មរបស់ប្រទេសនេះរស់រវើកឡើងវិញក៏ថាបាន៕