នៅទីក្រុង Hasaka ភាគឦសាននៃប្រទេសស៊ីរី លោក Majid Al-Khalaf វ័យ ៤៧ឆ្នាំ បានឈរក្នុងជួរដ៏វែងតាំងពីព្រឹកព្រលឹម ដើម្បីដាក់បំពេញទឹកក្នុងធុងរបស់លោក ចំពេលវិបត្តិទឹកធ្ងន់ធ្ងរដែលទីក្រុង Hasaka កំពុងជួបប្រទះ។

លោក Khalaf បាននិយាយថា លោក និងអ្នកជិតខាងរបស់លោកពឹងផ្អែកលើអាងទឹកមួយ ឬពីរ ដែលមនុស្សងាកមកបំពេញធុងរបស់ខ្លួនជាមួយនឹងទឹកសម្រាប់បរិភោគ និងលាងសម្អាត។

លោក Issa Younis មន្ត្រីនៅអគ្គនាយកដ្ឋានទឹក ក្នុងទីក្រុង Hasaka បាននិយាយថា បញ្ហានេះបានបន្តអស់រយៈពេល ៤ឆ្នាំមកហើយ ចាប់តាំងពីមានការគ្រប់គ្រងរបស់ប្រទេសទួរគីលើក្រុង Ras Al Ain។

ជាមួយគ្នានេះ លោកក៏បានគូសបញ្ជាក់ផងដែរថា បម្រែបម្រួលអាកាសធាតុ និងការមានភ្លៀងមិនជាប់លាប់ នាពេលថ្មីៗនេះ បង្កឲ្យកម្រិតទឹកនៅតាមអណ្តូងមានការខ្វះខាត ដែលធ្វើឲ្យស្ថានភាពកាន់តែលំបាកទៅៗ។

លោក Younis បានពិពណ៌នាអំពីស្ថានភាពទឹកបច្ចុប្បន្ន នៅក្រុង Hasaka ថា ជា «មហន្តរាយមនុស្សធម៌» ដោយអំពាវនាវឲ្យអង្គការអន្តរជាតិផ្តល់ជំនួយចាំបាច់ដល់ប្រជាជនក្នុងទីក្រុងនេះ ដើម្បីប្រយុទ្ធប្រឆាំងនឹងវិបត្តិនេះ៕