ឥណ្ឌូនេស៊ី ៖ អ្នកជិះស្គីលើរលកជនជាតិអូស្ត្រាលី៤នាក់ ត្រូវបានរកឃើញនៅមានជីវិតរស់នៅបន្ទាប់ពីទូករបស់ពួកគេ បានបាត់ដានក្នុងអាកាសធាតុមិនអំណោយផល នៅឆ្នេរខាងកើត នៃខេត្តអាឆេ (Aceh) ប្រទេសឥណ្ឌូនេស៊ី កាលពីថ្ងៃអាទិត្យ ប៉ុន្តែទោះជាយ៉ាងណា សមាជិកនាវឹកឥណ្ឌូនេស៊ីម្នាក់ក្នុងចំណោម៣នាក់ ត្រូវបានគេជឿថា នៅបាត់ខ្លួននៅឡើយ។

យោងតាមទីភ្នាក់ងារសង្គ្រោះជាតិប្រទេសឥណ្ឌូនេស៊ី បានឲ្យដឹងថា មនុស្ស៧នាក់ បានជិះនៅលើទូកឈើប្រវែង១០ម៉ែត្រមួយគ្រឿង ធ្វើដំណើរពី កោះ Nias ទៅកាន់កោះ Banyak ខេត្ត អាឆេ (Aceh) នៅពេលនោះពួកគេត្រូវបានបំបែកពីទូកទី២អំឡុងអាកាសធាតុមិនអំណោយផល នៅម៉ោងប្រហែល៦ល្ងាចថ្ងៃអាទិត្យ ម៉ោងក្នុងតំបន់។ 

យោងតាមសារព័ត៌មាន Nine News បានឲ្យដឹងថា អ្នកជិះរលកទាំងអស់៤នាក់ ត្រូវបានរកឃើញមានសុវត្ថិភាព។ របាយការណ៍ដែលមិនត្រូវបាបញ្ជាក់ បាននិយាយថា សមាជិកនាវឹក២នាក់ ត្រូវបានរកឃើញថា មានសុវត្ថិភាព ប៉ុន្តែម្នាក់នៅបាត់ខ្លួននៅសមុទ្រនៅឡើយ។

ទីភ្នាក់ងារសង្គ្រោះជាតិ ប្រទេសឥណ្ឌូនេស៊ី បានប្រាប់សារព័ត៌មានរ៉យទ័រថា ទីភ្នាក់ងារបានដាក់ពង្រាយក្រុមជួយសង្គ្រោះទៅកាន់តំបន់អ្នកដែលនៅរស់រកឃើញ ប៉ុន្តែពុំបានបញ្ជាក់ព័ត៌មានណាមួយអំពីអ្នកដែលត្រូវបានជួយសង្គ្រោះឡើយ។