ជប៉ុន ៖ អ្នកដំណើរដែលបានជាប់ខ្លួន បានឈរនៅជាមួយអីវ៉ាន់របស់ពួកគេ នៅស្ថានីយ៍រថភ្លើង Nagoya ប្រទេសជប៉ុននៅថ្ងៃអង្គារទី១៥ ខែសីហានេះ បន្ទាប់ពីសេវារថភ្លើង ត្រូវបានបញ្ឈប់ ខណៈព្យុះទីហ្វុង Lan បានបក់បោកមកដល់ដីគោក នៅតំបន់ភាគខាងលិច របស់ប្រទេស។

ប្រតិបត្តិការរថភ្លើងល្បឿនលឿន ឬរថភ្លើងក្បាលគ្រាប់កាំភ្លើង បានលុបចោលប្រតិបត្រតិការ រវាងក្រុងនានា នៃទីក្រុង Nagoya និងទីក្រុងOkayama ខណៈសេវាជាច្រើនរវាងទីក្រុង Tokyo និងទីក្រុង Nagoya ត្រូវបានកាត់បន្ថយច្រើន។ 

ដោយរំកិលខ្លួនចូលពីមហាសមុទ្រប៉ាស៊ីហ្វិក ព្យុះទីហ្វុងLan បានបោកបក់មកដល់ដីគោក នៅចុងភាគខាងត្បូង នៃខេត្ត Wakayama មានចម្ងាយប្រមាណ ៤០០គីឡូម៉ែត្រភាគនិរតី ទីក្រុងតូក្យូនៅព្រឹកថ្ងៃអង្គារនេះ។ 

យោងតាមទីភ្នាក់ងារអាកាសធាតុជប៉ុន បានឲ្យដឹងថា ព្យុះនេះត្រូវបានគេព្យាករណ៍ថា នឹងទៅដល់សមុទ្រជប៉ុននៅព្រឹកថ្ងៃពុធ ទី១៦ ខែសីហា និងបន្តឆ្ពោះទៅភាគខាងជើង តាមបណ្តោយសមុទ្រ។