អៀរឡង់ ៖ ថ្ងៃអង្គារ (ទី១៥ ខែសីហា) នេះ គឺជាខួបលើកទី២៥ នៃការបំផ្ទុះគ្រាប់បែក ក្នុងឆ្នាំ១៩៩៨ នៅទីក្រុង Omagh របស់ដែនដីអៀរឡង់ខាងជើង ដែលជាការវាយប្រហារដ៏អាក្រក់បំផុត ក្នុងរយៈពេលជាច្រើនទសវត្សរ៍នៃអំពើហិង្សា ដែលគេស្គាល់ឈ្មោះថា «The Troubles» (ចលាចលនយោបាយ ឬការបង្កចលាចលសាធារណៈ នៅអៀរឡង់ ក្នុងទសវត្សរ៍ឆ្នាំ១៩២០ ឬនៅអៀរឡង់ខាងជើង នាចុងទសវត្សរ៍ឆ្នាំ១៩៦០ និងចុងទសវត្សរ៍ឆ្នាំ១៩៩០)។

រដ្ឋាភិបាលអង់គ្លេស បានលើកឡើងកាលពីខែកុម្ភៈថា ខ្លួននឹងបើកការស៊ើបអង្កេតលើការវាយប្រហារ ដែលក្នុងនោះមនុស្ស ២៩នាក់ ត្រូវបានសម្លាប់ដោយការបំផ្ទុះរថយន្ត ពោលគឺមានរយៈពេលត្រឹមតែប៉ុន្មានខែបន្ទាប់ពីកិច្ចព្រមព្រៀង Good Friday បានកើតឡើង។

ក្នុងហេតុការណ៍នាពេលនោះ ស្ត្រីពរពោះកូនភ្លោះម្នាក់ បានស្ថិតក្នុងចំណោមអ្នកស្លាប់ទាំងនោះ ព្រមទាំងក្មេងជំទង់ ៦នាក់ ក្មេងៗ ៦នាក់ និងភ្ញៀវទេសចរអេស្ប៉ាញ ២នាក់ ខណៈមនុស្ស ២០០នាក់ផ្សេងទៀត រងរបួស។

កងទ័ពសាធារណរដ្ឋអៀរឡង់ពិត (Real IRA) ដែលជាក្រុមយោធាប៉ារ៉ាប្រឆាំងសាធារណរដ្ឋអៀរឡង់ បានអះអាងទទួលខុសត្រូវ ចំពោះការបំផ្ទុះនោះ ហើយក្រោយមក បានសម្ដែងការសុំទោស ដោយនិយាយថា ការវាយប្រហារនេះ មិនមានចេតនាសំដៅលើជនស៊ីវិលនោះឡើយ។

សម្រាប់ការស៊ើបអង្កេត រដ្ឋាភិបាលអង់គ្លេសនិយាយថា គឺផ្តោតទៅលើការប្រមូលភ័ស្តុតាងថា តើការបំផ្ទុះគ្រាប់បែកនេះ អាចទប់ស្កាត់បាន ឬយ៉ាងណា។ នៅឆ្នាំ២០២១ តុលាការជាន់ខ្ពស់អង់គ្លេស បានស្នើឡើងថា គួរតែចាប់ផ្ដើមឲ្យមានការស៊ើបអង្កេតមួយ ដើម្បីសន្និដ្ឋានថា តើសន្តិសុខមិនបានអនុវត្តសកម្មភាពលើការស៊ើបការណ៍សម្ងាត់ ដើម្បីរារាំងការវាយប្រហារនោះ ឬយ៉ាងណា៕